सीमामा जोखिम मोलेर काम गर्ने स्वास्थ्यकर्मीले ५ महिनादेखि पाएनन् तलब

धनगढी । सीमा नाकाका कोरोना संक्रमणको जोखिम मोलेर काम गर्दै आएका स्वास्थ्यकर्मीले ५ महिना देखि तलव नपाउँदा काम गर्न समस्या भएको गुनासो गरेका छन् ।

दैनिक भारतबाट फर्कने नागरिकको कोरोना परिक्षण गर्दा आफुपनि संक्रमणको उच्च जोखिममा रहने सुदूरपश्चिमका सवै नाकामा बस्ने स्वास्थ्यकर्मीले ५ महिना देखि तलव नपाएको पाइएको हो ।

स्वास्थ्य निर्देशनालयले भने विभागबाट तलव निाकसी नहुदा कर्मचारीलाई तलव दिन नसकिएको जनाएको छ ।

सीमा नाकामा काम गर्ने स्वास्थयकर्मीले गत साउन देखि तलब नपाएको बताएका छन् । ‘साउनमा तलब खाएको त्यसपछि बजेट छैन भन्दै तलब पाइएको छैन, अब त खर्च चलाउन समेत गाह्रो भइसक्यो,’ गड्डाचौकीस्थित हेल्थ डेस्कका इन्चार्ज प्रेमसिंह भण्डारीले भने, ‘पारिश्रमिक मात्रै होइन करार पनि थपिएको छैन, काम गर्दै गर्नुस् करार थपिन्छ भन्छन्, न करार थपिन्छ, न पारिश्रमिक आउछ ।’ गड्डाचौकी हेल्थ डेस्कमा १२ जना स्वास्थ्यकर्मी कार्यरत छन् ।

गौरीफन्टा नाकामा रहेको हेल्थडेस्कमा पुसदेखि कोरोना परीक्षणमा कडाई गरिएको हेल्थ डेस्कका इन्चार्ज गणेश साउँदले बताए । ‘६ महिनादेखि पारिश्रमिक नपाएरै काम गरिरहेका छौं,’ साउँदले भने, ‘निर्देशनालयमा बुझ्दा विभागबाटै आएको छैन भन्ने खबर आउँछ, पारिश्रमिक कहिले पाइने हो कुनै ठेगान छैन ।’

पुस पहिलो साता भारतबाट घर फर्किने ९ जनामा संक्रमण देखिएको थियो । दिल्ली, बेङ्लौर र चन्दीगढलगायतका क्षेत्रबाट आएकामा संक्रमण देखिएको थियो । गड्डाचौकीमा अहिले दैनिक २५÷३० जनाको परीक्षण भइरहेको छ ।

सुदूरपश्चिममा गौरीफन्टा र गड्डाचौकीसँगै बैतडीको झुलाघाट र दार्चुलामा गरी ४ स्थानामा हेल्थ डेस्क स्थापना गरिएको छ । हेल्थ डेस्क स्थानीय तहहरुले स्थापना गरे पनि कर्मचारीको व्यवस्थापन स्वास्थ्य सेवा विभागले गर्दै आएको छ । विभागबाटै बजेट निकासा नभएका कारण तलब दिन नसकिएको प्रदेश स्वास्थ्य निर्देशनालयका कोभिड फोकल पर्सन हेमराज जोशीले बताए ।

जोशीका अनुसार सुदूरपश्चिमका चार वटै हेल्थ डेस्कमा करारमा कार्यरत स्वास्थ्यकर्मी २७ जना छन् । उनीहरुले साउनपछि पारिश्रमिक पाउन सकेका छैनन् ।