टुँडिखेलमा लागेको माघिमेलामा भीड अनियन्त्रित हुँदा ८ जना घाइते

काठमाडौं । काठमाडौंको टुँडिखेलमा लागेको माघी मेलामा भीड अनियन्त्रित हुँदा ८ जना घाइते भएका छन् ।

सोमबार मगर समुदायको माघेसक्राति र थारू समुदायको माघी मनाउन टुँडिखेलमा कार्यक्रम आयोजना गरिएको थियो । सो कार्यक्रममा प्रधानमन्त्री पुष्पकमल दाहाल प्रचण्ड सहभागी हुने कार्यतालिका रहेको थियो । कार्यक्रममा सहभागी हुन पुगेकाहरू टुँडिखेल प्रवेश गर्ने क्रममा अनियन्त्रित बनेको प्रहरीले जनाएको छ ।

जिल्ला प्रहरी परिसर काठमाडौंका एसपी कुमोध ढुंगेलका अनुसार भीड अनियन्त्रित हुँदा घाइते हुनेको संख्या आठ पुगेका छन् । प्रहरीले भीड नियन्त्रण गर्न लाठी चार्जसमेत गरेको थियो ।  

घाइतेहरूको राष्ट्रिय ट्रमा सेन्टरमा उपचार भइरहेको जनाइएको छ । घाइते सवैको अवस्था सामान्य नै रहेको एसपी ढुंगेलले बताए ।