बझाङमा हत्या आरोपमा बाबुछोरा पक्राउ

धनगढी । बझाङमा एक युवकको हत्या आरोपमा प्रहरीले बाबुछोरालाई पक्रउ गरेको छ ।

जिल्ला प्रहरी कार्यालय बझाङका अनुसार जिल्लाको छबिसपाथिभेरा गाउँपालिका–७ सुवेडाका ४० बर्षिय रामप्रसाद जोशीको हत्या भएको थियो । हत्या आरोपमा सोही ठाउँका ४८ बर्षिय जयबहादुर हमाल र उनका २९ बर्षिय छोरा जनक हमाललाई प्रहरीले पक्राउ गरेको हो । पक्राउ परेका दुवै जना मृतकका छिमेकी रहेको प्रहरीले जनाएको छ ।

जिल्ला प्रहरी कार्यालय बझाङका प्रमुख प्रहरी नायब उपरीक्षक (डीएसपी) भरत शाहले आइतबार दिउँसो मदिरा सेवन गरेर बाबुछोराले जोशीमाथि कुटपिट गरेको बताए । कुटपिटबाट घाइते जोशीको राति उपचारका क्रममा मृत्यु भएको थियो ।

आपसी विवादका क्रममा जोशीमाथि कुटपिट भएको बताइएपनि विस्तृत कारण भने खुल्न बाँकी रहेको प्रहरीको भनाइ छ । मृतक जोशीको शव परीक्षणका लागि जिल्ला अस्पताल बझाङमा राखिएको छ । घटनाबारे थप अनुसन्धान भइरहेको प्रहरीले जनाएको छ ।