धनगढीका नगरप्रमुख हमाललाई ज्यान मार्ने धम्की

धनगढी । धनगढी उपमहानगरपालिकाका नगर प्रमुख गोपाल हमाललाई सामाजिक सञ्जाल मार्फत एक व्यक्तिले ज्यान मार्ने धम्की दिएका छन् । सामाजिक सञ्जाल ह्वाट्सएप बाट नगर प्रमुख हमाललाई ज्यान मार्ने सम्मको धम्कि दिएको पाइएको जिल्ला प्रहरी कार्यालय कैलालीले जनाएको छ ।

जिल्ला प्रहरी कार्यालय कैलालीका प्रबक्ता प्रहरी नायव उपरिक्षक कुलदिप चन्दका अनुसार स्थानीय राना थरका एक व्यक्तिले आफूलाई खबरदार भन्दै ज्यान मार्ने धम्की दिएपछि मेयर हमालले प्रशासनमा उजुरी समेत दिएका छन् ।

उनका अनुसार जिल्ला प्रशासन कार्यालयमार्फत निवेदन जिल्ला प्रहरी कार्यालयमा पुगेको छ । ‘ह्वाट्सएपमा कल गर्दै राना थरका व्यक्तिले ज्यान मार्ने धम्की दिएको पाइएको छ,’ प्रबक्ता चन्दले भने, ‘उसले नगर प्रमुअख हमाललाई खबरदार भन्ने सन्देश पनि ह्वाट्सयपमा छोडेको छ ।’

नगर प्रमुख हमालले आफूलाई राति ज्यान मार्ने धम्की दिएको जनाएका छन् । तर उनले धम्की दिनेको नाम भने निवेदनमा खुलाएका छैनन् । प्रहरी प्रबक्ता चन्दले धम्की दिने राना कैलालीकै बर्दगोरिया स्थित बौनिया क्षेत्रमा रहेको पाइएको र प्रहरी उनलाई खोजिरहेको बताए ।

‘रानाले आफै प्रहरी कार्यालयमा उपस्थित हुने जानकारी पनि दिएका छन्,’ प्रबक्ता चन्दले भने, ‘हामी उसको आस्वासनमा बस्नेकुरा भएन खोजि गरिरहेका छौं ।’ घटनापछि नगरप्रमुख हमालको निग्रानी बढाइएको उनले बताए । नगर प्रमुख हमालले सुरक्षाकर्मीको माग भने गरेका छैनन् ।