सम्मानजनक हैसियत नपाए नयाँ तरिकाले सोच्नेछौं : सोडारी

धनगढी । नेकपा एकीकृत समाजवादी पार्टी सुदूरपश्चिम प्रदेश संसदीय दलका नेता दिर्घ सोडारीले गठबन्धनमा रहेका सवै दलले सम्मानजनक हैसियत पाउनुपर्ने बताएका छन् । नेता सोडारीले नयाँ गठबन्धनमा आफ्नो दलको सम्मानजनक हैसियत नस्वीकार्न अवस्था देखिएको भन्दै त्यसको परिणाम राम्रो नहुने चेतावनी पनि दिएका छन् ।

‘नयाँ गठबन्धनमा छलफल चलिरहेको छ,’ उनले भने, ‘तर हाम्रो सम्मानजनक अवस्था स्वीकार्ने संकेत देखिँदैन, त्यसैले हामी चाँडै नयाँ निर्णयमा पुग्दैछौं ।’ सोडारीले आफूहरू जसलाई सहयोग गर्न पनि स्वतन्त्र रहेको बताए । उनले भने, ‘मुख्यमन्त्री कमल शाह अहिलेसम्म विश्वासको मतका लागि प्रदेशसभामा जानुभएको छैन । विश्वासको मतका बेला हाम्रो सहयोग रहन सक्छ ।’

यता मुख्यमन्त्री कमल शाहले पनि एकीकृत समाजवादीसँग पनि सकारात्मक छलफल भइरहेको बताए । उनले भने, ‘हामी विश्वासको मत पाउँछौं । २–३ दिनभित्र विश्वासको मत लिन्छौं ।’ नेपाली कांग्रेस, नाउपा र एकीकृत समाजवादी एक ठाउँमा भए कमल शाह नेतृत्वको सरकारले सहजै विश्वासको मत पाउने छ । कांग्रेसका १८, नाउपाका ७ र एकीकृत समाजवादीका ४ जना प्रदेशसभा सदस्य रहेका छन् ।

नयाँ गठबन्धनमा रहेको नेकपा माओवादी केन्द्रले भने आज नै प्रदेश संसदीय दलको बैठकबाट नयाँ समीकरण अनुसार सरकार गठन गर्न पहल गर्ने निर्णय गरेको छ । संसदीय दलका नेता मानबहादुर धामीको अध्यक्षतामा बसेको संसदीय दलको बैठकले नयाँ समीकरणअनुसार सरकार निर्माण गर्न पहल गर्ने निर्णय गरेको हो ।

नेता धामीले संघमा बनेको नयाँ समीकरणअनुसार सरकार निर्माण गर्ने निर्णय गरेको जानकारी दिए । शाहले २२ चैतभित्र प्रदेशसभामा विश्वासको मत लिनुपर्नेछ । शाहले आफ्नो पक्षमा बहुमत जुटाउन नाउपाका सातमध्ये पाँच जनालाई मन्त्री बनाएका छन्, तर नाउपाको आन्तरिक किचलोका कारण मुख्यमन्त्री शाहले विश्वासको मत लिने मिति तय गर्न सकेका छैनन् । कांग्रेसका १८ र नाउपाका ७ गरेर शाहको पक्षमा २५ जना छन् । राप्रपाकी खेमादेवी विष्ट र स्वतन्त्र सांसद डा.ताराप्रसाद जोशीको समर्थन लिएर शाह आफ्नो पक्षमा बहुमत सांसद २७ जना पुर्याउने पक्षमा छन् ।