एमालेले अझै दिएन सुदुरपश्चिमको मुख्यमन्त्रीका लागि सोडारीको नाममा समर्थन

धनगढी । सुदुरपश्चिमको मुख्यमन्त्रीमा दावी पेश गर्ने अन्तिम दिन भैसक्दा पनि नेकपा एकीकृत समाजवादीका नेता दिर्घ सोडारीको नाममा एमालेले समर्थन गरेको छैन । एमालेले सोडारीको नाममा अहिलेसम्म पनि समर्थन नजनाउदा मुख्यमन्त्रीमा दावीमा अन्यौलता बढेको छ ।

सुदुरपश्चिमको मुख्यमन्त्रीमा दावी पेश गर्ने आज (बिहीवार) अन्तिम दिन हो । प्रदेश प्रमुख नजिर मियाले १६८ (२) कमोजिम दुई वा दुई भन्दा बढी दलको   समर्थनमा मुख्यमन्त्रीको दावी पेश गर्न आज (बिहीवार) साझ ५ बजेसम्मको समय  तोकेका छन् ।

मुख्यमन्त्रीमा समर्थनका बारेमा केन्द्रबाट निर्देशन नआइसकेको नेकपा एमालेका तर्फबाछ  प्रदेश सभा सदस्य धर्मराज पाठक बताउँछन् । ‘गठबन्धन गर्ने निर्णय केन्द्रले गरेको हो । त्यसैले कसलाई मुख्यमन्त्री बनाउने भन्ने निर्णय पनि केन्दैले नै गर्छ ।’ पाठक भन्छन् ‘तर अहिलेसम्म मुख्यमन्त्रीमा समर्थन गर्नेबारेमा पार्टी केन्द्रको निर्देशन आइसकेको  छैन । हामी निर्णय पर्खेर बसेका छौं ।’

बैशाख २ गते  प्रधानमन्त्री एवम नेकपा मओवादी केन्द्रका अध्यक्ष पुष्पक कमल दाहाल सहितका नेता सुदुरपश्चिममा नेकपा एसलाई मुख्यमन्त्री दिन सहमत भएका थिए । तर नेकपा एसले मुख्यमन्त्रीमा निर्णय गरेको संसदिय दलका  नेता दिर्घ सोडारीको नाममा नेकपा एमालेले असहमति जनाएको छ । सोडारी बाहेकका अरुका नामा समर्थन गर्न सकिने एमालेको भनाई छ ।

केन्द्रबाट सोडारीको नाममा समर्थन नआउदा अहिलेसम्म सत्ता गठबन्धनका प्रदेश स्तरको बैठक समेत बस्न सकेको छैन ।