कार्यकर्तामुखी योजना भएको भन्दै थलारामा कांग्रेसको विरोध

धनगढी

 बझाङको थलारा गाउँपालिकाले ल्याएको बजेट कार्यकर्ता मुखी भएको भन्दै प्रतिपक्षी दल नेपाली कांग्रेसले बिरोध जनाए पछि गाउँपरिषद स्थगित भएको छ ।

 गाउँपालिकाले अषाढ १० गते नीति तथा कार्यक्रम पेस गरेको थियो भने असार मसान्तमा मात्रै बजेट लायएको हो । तर सो बजेट कार्यकर्ता मुखी भएको भन्दै नेपाली कांगे्रसबाट निर्वाचित जनप्रतिनिधीहरुले बिरोध जनाउँदै आएका छन् । जसका कारण थलारा गाउँपालिकाको नीति तथा कार्यक्रम हाल सम्मपनि नगरसभाबाट पारित हुन सकेको छैन ।

 काँग्रेस समर्थित जनप्रतिनिधिले गाउँसभामा आफ्नो कुराको सुनुवाइ नभएपछि दबाबका लागि पार्टीको साथ लिएर कार्यालयमा विरोध समेत जनाएका छन् । थलारा–२ का वडाध्यक्ष हेम खड्काले  काँग्रेसबाट निर्वाचित सदस्यको बेवास्ता गर्दै आफूखुशी मनोमानी ढङ्गले कार्यकर्ता र आफ्ना मान्छेलाई मात्र योजना वितरण गरिएको आरोप लगाए । 

 नौ वडा रहेको गाउँपालिकामा प्रत्येक वडामा ४० लाख बजेट दामासाहीले छुट्याइएको र अन्य सबै बजेट गाउँपालिका अध्यक्ष लगायत अन्य प्रतिनिधिले गुपचुप रुपमा बाँडफाँट गरेको काँग्रेस समर्थित जनप्रतिनिधिको आरोप छ । गाउँपालिका अध्यक्ष भुवनेश्वर उपाध्यायले विकास बजेट रु ११ करोड जति भएको, यसमा दुई करोड जति म्याचिङ फन्ड गएको तथा बाँकी रु ४०÷४० लाख वडालाई विनियोजन गरी विषयगत शाखालाई बजेट राख्दा ठीकै भएको बताए ।

 उनले भने–‘काँग्रेसबाट निर्वाचित जनप्रतिनिधि ले आफ्नो वडाका लागि १ करोड बजेट माग गरेका थिए, हामीले कसैलाई काखा र कसैलाई पाखा किन लगाउने ?’ आफूले स्थानीय सरकार प्रमुखको हैसियतले सुशासन, पारदर्शिता र जवाफदेहितालाई जोड दिएको बताउँदै उपाध्यायले भ्रष्टाचार र भ्रष्टाचारजन्य कार्य गरे कसैलाई क्षम्य नहुने दृढता व्यक्त गरे ।