दार्चुलाबाट धनगढी आउँदै गरेको जिप दुर्घटना, एक यात्रुको मृत्यु

दार्चुला । दार्चुलाबाट धनगढीका लागि छुटेको जिप डोटी जिल्लाको बुडरमा दुर्घटना भएको छ । बुधबार बिहान डोटीको बुडरमा दुर्घटना हुँदा एक यात्रुको घटनास्थलमै मृत्यु भएको छ भने ८ जना घाइते भएका छन् ।

दार्चुलाबाट धनगढी जाँदै गरेको जिप डोटीमा दुर्घटना, एक यात्रुको मृत्यु दार्चुलाको लेकम गाउँपालिकाबाट धनगढीका लागि छुटेको सुदूरपश्चिम प्रदेश ०१ ००१ ज १४८९ नम्बरको जिप बुधवार बिहान धनगढी आउँदै गर्दा बुडर नजिक दुर्घटनामा परेको इलाका प्रहरी कार्यालय बुडरका वरिष्ठ प्रहरी नायब निरीक्षक धनन्जय कुमार मल्लले बताए ।

उनले घटनास्थलमै ज्यान गुमाएका एक जनाको परिचय खुल्न बाँकी रहेको र चालकसहित ८ जना घाइते भएको बताए ।

मल्लका अनुसार दुर्घटनामा घाइते हुनेमा बैतडीको डिलाशैनी गाउँपालिका–५ का १९ वर्षीय चालक बासुदेव नाथ, डिलाशैनी–६ का १७ वर्षीय अर्जुन लुहार र २२ वर्षीया रेखा ओड, दार्चुला लेकमका ४५ वर्षीय जगत धामी, ३१ वर्षीय हरिस पार्की, उनकी श्रीमती भावना पार्की र ३ वर्षीया छोरी रितिका पार्की तथा मालिकार्जुन गाउँपालिका–४ की ६० वर्षीया मानमती धामी छन् ।

बिहान ५ बजे घाइतेहरुको उद्धार गरी धनगढीस्थित निसर्ग हस्पिटलमा पठाइएको मल्लले बताए । घाइते ८ जनामध्ये ४ जनालाई बढी चोट लागेको र ४ जनाको अवस्था सामान्य रहेको प्रहरीले जनाएको छ ।