कर संकलन गर्न सुदुरपश्चिम प्रदेश सरकारद्धारा अध्यादेश पारित, प्रमाणीकरणको लागि पठाइयो

धनगढी । सुदूरपश्चिम प्रदेश सरकारले ‘सुदूरपश्चिम सामयिक कर संकलनसम्बन्धी अध्यादेश २०८१ पारित गरेको छ । बिहीबार बिहान बसेको मन्त्रिपरिषद्को बैठकले अध्यादेश पास गरेको हो ।

मन्त्रिपरिषदले पास गरेको अध्यादेश प्रमाणिकरणका लागि सुदुरपश्चिम प्रदेश प्रमुखको कार्यालय पठाइएको छ ।

प्रदेशमा रोकिएको कर संकलन बन्दभएको अवस्था अन्त्य गर्न बिहीबार बिहान बसेको मन्त्रिपरिषद्को बैठकले अध्यादेश पास गरेको मुख्यमन्त्री कमल बहादुर शाहले बताए ।

प्रदेश प्रमुखले प्रमाणिकरण गरेपछि उक्त अध्यादेश ऐन सरहको कानुन बन्नेछ र प्रदेशभरी रोकिएको कर संकलनको कार्य सुचारु हुनेछ ।

प्रदेश सरकारले ल्याउन लागेको अध्यादेशमा गत आर्थिक वर्षकै करका दरहरू राखिएका छन् । यसपाली प्रस्तुत भएको बजेटमा यातायात करमा केही संशोधन गरिएको भए पनि बजेट पास नभएकाले तत्कालका लागि अध्यादेशमा पुरानै करका दरहरू समावेश गरिएको आर्थिक मामिला मन्त्रालयका सचिव झलकराम अधिकारीले बताए ।

तत्कालिन मुख्यमन्त्री दीर्घ बहादुर सोडारी नेतृत्वको सरकार असार १ गते संसदमा प्रस्तुत गरेको बजेट पास हुन नसकेपछि साउन १ गते देखि सुदूरपश्चिम प्रदेशमा राजश्व संकलन बन्द भएको छ ।

बजेट पास नभएपछि प्रदेश सरकारले उठाउने यातायात कर, लिखित पाससम्बन्धी कर, स्थानीय तहहरूले लिने मनोरञ्जन करलगायतको कर संकलन कार्य शून्य भएको छ ।