कैलालीमा ट्यांकरका चालक र सहचालकमाथि धारिलो हतियार प्रहार

धनगढी । कैलालीमा ट्यांकरका चालक र सहचालकमाथि धारिलो हतियार प्रहार भएको छ।

जिल्लाको धनगढी उपमहानगरपालिका-२ मा रहेको ट्यांकर पार्किङस्थलमा दुईवटा मोटरसाइकलमा आएका समूहले ट्यांकर चालक र सहचालकमाथि शनिबार राति कुटपिट र धारिलो हतियार प्रहार गरेका हुन्।

जिल्ला प्रहरी कार्यालय कैलालीका प्रवक्ता एवम् प्रहरी नायव उपरीक्षका डिएसपी कविन्द्र बोहराका अनुसार अज्ञात समूहको आक्रमणबाट ना ६ ख ९४०६ नम्बरको ट्यांकर चालक डडेलधुराको गन्यापधुरा गाउँपालिका-१ का २४ वर्षीय हरेन्द्र देउवा र सहचालक  कैलालीको गोदावरी नगरपालिका-४ का २२ वर्षीय अनील देउवा घाइते भएका छन्।

उनीहरूको सेती प्रादेशिक अस्पतालमा उपचार भइरहेको छ। उनीहरूलाई सामान्य चोटपटक मात्रै लागेको र वार्डमै राखेर उपचार भइरहेको डिएसपी बोहराले जानकारी दिए।

डिएसपी बोहराका अनुसार से ६ प ९३९७ र अल्फाबेट नखुलेको ३०३० नम्बरको मोटरसाइकलमा आएका व्यक्तिहरुले चालक सहचालकमाथि आक्रमण गरी भागेका थिए।

उनीहरूको खोजी भइरहेको डिएसपी बोहराले जानकारी दिए। ट्यांकर चालक र सहचालक र आक्रमण गर्न आएका समूहको एक व्यक्तिसँग मेसेन्जर च्याटमा विवाद भएको खुलेको छ।

शनिबार राति समूहमा आएकाहरूले मेसेन्जरमा झगडा परेको नभई अर्कै चालक र सहचालकमाथि आक्रमण गरेको डिएसपी बोहराले जानकारी दिए।

उनीहरूले पार्किङस्थलका अन्य चार ट्यांकर पनि तोडफोड गरेका छन्।  मेसेन्जरमा झगडा भएका चालक र सहचालकलाई बोलाएर प्रहरीले सोधपुछ गरी घटनाको अनुसन्धान अगाडि बढाएको छ।