खैरो हेरोइनसहित तीन युवक पक्राउ

धनगढी । कैलालीबाट खैरो हेरोइनसहित तीन युवक पक्राउ परेका छन्। जिल्लाको गोदावरी नगरपालिका–१ अत्तरियाबाट चुरे गाउँपालिका–३ बस्ने २१ वर्षीय निराजन शाह पक्राउ परेका हुन्।

शाहलाई १ ग्राम २३० मिलिग्राम लागू औषध (खैरो हेरोइन) सहित फेला पारि इलाका प्रहरी कार्यालय मालाखेतीबाट खटिएको प्रहरी टोलीले नियन्त्रणमा लिएको जनाएको छ।

यस्तै धनगढीबाट बैतडी तर्फ जाँदै गरेको सुदूरपश्चिम ०१ ००१ ज १४३४ नम्बरको जिपमा सवार डोटीको जोरायल गाउँपालिका–२ भट्टेखोला बस्ने २४ वर्षीय दिपक बिष्ट र २४ वर्षीय गोबिन्द बिष्ट पक्राउ परेका छन्।

यी दुबै जनालाई २ ग्राम ७९० मिलिग्राम लागू औषधसहित फेला पारि अस्थायी प्रहरी पोष्ट खानिडाँडाबाट खटिएको प्रहरी टोलीले पक्राउ गरेको जनाएको छ। यी तीनै जनालाई प्रहरीले बुधवार नियन्त्रणमा लिएको जनाएको छ।