दुई नाल भरुवा बन्दुकसहित एक जना पक्राउ

धनगढी । कैलालीमा गोलीसहितका दुई थान भरुवा बन्दुक प्रहरीले बरामद गरेको छ ।

अस्थायी प्रहरी पोष्ट गोदावरीबाट खटिएको प्रहरी टोलीले कैलालीको गोदावरी नगरपालिकामा पर्ने चैतडा सामुदायिक जंगलको खोल्सोमा लुकाई–छिपाई राखेको अवस्थामा दुई थान भरुवा बन्दुक बरामद गरेको हो ।

जिल्ला प्रहरी कार्यालय कैलालीले दिएको जानकारी अनुसार दुई थान भरूवा बन्दुक, सोही बन्दुक नजिकै रहेको कालो रङको झोलाभित्र चार ओटा फलाम र चार ओटा सिसाको गोली र दुई सय ग्राम बारुद पनि बरामद गरिको छ ।

प्रहरीले बन्दुक बरामद भएको सामुदायिक वनको नजिकै घर भएका लालबहादुर बुढामगरलाई नियन्त्रणमा लिएर अनुसन्धान सुरु भएको जनाएको छ ।

चुरे आसपासमा सिकार गर्नका लागि बन्दुकहरू लुकाएर राखिएको हुनसक्ने अनुमान प्रहरीले गरको छ ।