धनगढी उपमहानगरद्वारा ५५१ मृतकका आफन्तलाई दाहसंस्कार खर्च

कैलालीको धनगढी उपमहानगरपालिकाले पाँच सय ५१ मृतकका आफन्तलाई दाहसंस्कार खर्च उपलब्ध गराएको छ । गत वर्ष २०८० साल असोज २ गतेबाट दाह संस्कार खर्च उपलब्ध गराउँदै आएको उपमहानगरपालिकाले २०८१ सालको माघ दोस्रो सातासम्म सो संख्यामा परिवार लाभान्वित भएका छन् । 

धनगढीमा कुनै नगरवासीको मृत्यु हुँदा आर्थिक अभावमा दाहसंस्कार गर्न समस्या नहोस् भनेर दाह संस्कार खर्च उपलब्ध गराउँदै आएको धनगढी उपमहानगरीय प्रहरी बलका नगर प्रहरी प्रमुख लक्ष्मण सिंह धामीले बताए ।

मृतकको घरैमा नगर प्रहरी पठाएर आफन्तलाई दाहसंस्कार गर्न नगद पाँच हजार रुपैयाँ दिने गरेको उनले बताए । उनका अनुसार पाँच सय ५१ परिवारलाई पाँच हजार रुपैयाँका दरले दुई लाख ७५ हजार पाँच सय रुपैयाँ दाहसंस्कार खर्च उपलब्ध गराइएको छ ।

धनगढी उपमहानगरपालिकाले विपन्न, असहाय, आर्थिकस्थिति एकदमै कमजोर भई मृतकको दाहसंस्कार गर्न समस्या भएका आफन्तहरुलाई दाहसंस्कार खर्च उपलब्ध गराउँदै आएको छ ।

धनगढी उपमहानगरपालिकाले २०८० सालको भदौ ३१ गतेको २६ औँ कार्यपालिका बैठकबाट उपमहानगरपालिका क्षेत्र भित्रका मृतकको दाहसंस्कार गर्न समस्या भएका मृतकका आफन्तहरुलाई दाहसंस्कार खर्च उपलब्ध गराउँदै आएको हो ।

नगर प्रहरी प्रमुख धामीका अनुसार मृतकको घरमै गएर रकम हस्तान्तरण गर्नुका साथै दुईजना नगर प्रहरी शवलाई उपमहानगरपालिकाको झण्डा ओढार सलामी दिने गरेका छन् । उनले हालसम्म ४९ जना मृतकलाई दाहसंस्कार खर्च नदिई झण्डा ओढार सलामी मात्रै दिइएको बताए ।

उनले शव जलाउँदा टायर र पलास्टिकको प्रयोग नहोस् र विपन्न परिवारले दाउरा किनेर शव जलाउन भन्ने उदेश्यले मृतकका आफन्तलाई दाहसंस्कार खर्च उपलब्त्र गराएको बताए । दाहसंसकार खर्च आवश्यक नपरेकालाई सलामी मात्र दिने गरेको उनको भनाइ छ । दाहसंस्कार खर्च विपन्न परिवारलाई उपलब्ध गराउने उपमहानगरको उदेश्य रहेको भएपनि धनि व्यक्तीले समेत दाहसंस्कार खर्च माग्ने गरेकाले समेत आर्थिक लोड बढेको उनले बताए । दैनिक सरदरमा दाहसंस्कार दुई÷तीन जनाको हुने गरेको उनले बताए ।

उपमहानगरपालिकाले १९ वटा वडाका नगरबासिलाई दाहसंस्कार खर्चसहित झण्डा ओढार सलामी दिने गरेको भएपनि नगरबासी बाहेक बाहिर बाट आएर धनगढीमा दाहसंस्कार गर्ने मृतकको शवमा झण्डा ओढार सलामी मात्रै दिने गरेको छ ।

यसका साथै उपमहानगरपालिकाले घर तथा अस्पतालबाट घाटसम्म तथा अस्पतालबाट घरसम्म शव लैजान निःशुल्क शववाहन सेवा उपलब्ध गराउँदै आएको छ ।

उपमहानगरभित्र कुनै नागरिकको निधन भएमा प्रदान गरिदै आएको सेवा छिमेकी पालिकाहरुमा समेत विस्तार गरिएको छ । उपमहानगरपालिकाले छिमेकी पालिकाहरुमा पनि केही सेवाहरु उपलब्ध गराउँदै आइरहेको छ ।

उपमहानगरपालिकाले छिमेकी पालिका कैलारी गाउँपालिका, गौरीगंगा नगरपालिका, गोदावारी नगरपालिका, कृष्णपुर नगरपालिका र पुनर्वास नगरपालिकाका नागरिकहरुलाई शव चिस्यान सेवा उपलब्ध गराउँदै आइरहेको छ ।

उपमहानगरपालिकाले गोदावारी नगरपालिकामा शव चिस्यान सेवा उपलब्ध गराएको भएपनि अहिले सेवा बन्द गरेको छ । उपमहानगरपालिकाले हालसम्म दुई सय ३४ मृतकका परिवारलाई शव चिस्यान सेवा उपवलब्ध गराएको जनाएको छ ।

कसैको मृत्यु भएपछि टाढा रहेका आफन्त आइपुग्न ढिलो हुने भएपछि शवलाई चिस्यान केन्द्रमा राख्ने व्यवस्था मिलाइएको नगर प्रहरी प्रमुख धामीले बताए । मृतकका आफन्त काम विशेषले घरबाहिर भएका र उनीहरु नआउन्जेलसम्म शवलाई सुरक्षित राख्न निःशुल्करुपमा शव चिस्यान सेवा उपलब्ध गराइएको उनले बताए ।

उपमहानगरपालिकाले विद्युतबाट सञ्चालन हुने पाँचवटा शव चिस्यान मेसिनबाट सेवा दिइरहेको छ । तीनवटा धनगढीबासीका लागि तथा दुईवटा चिस्यान मेसिन छिमेकी पालिकालाई उपलब्ध गराउने गरेको छ ।