सुदूरपश्चिमबाट अख्तियारमा ११९८ उजुरी दर्ता

धनगढी । सुदूरपश्चिम प्रदेशबाट चालु आर्थिक वर्ष २०८१÷०८२ मा अख्तियार दुरुपयोग अनुसन्धान आयोग, महेन्द्रनगरमा एक हजार एक सय ९८ उजुरी दर्ता भएका छन् ।

अख्तियार दुरुपयोग अनुसन्धान आयोग, महेन्द्रनगरका सूचना अधिकारी चेतराज भट्टका अनु्सार प्रदेशका नौ वटै जिल्लाबाट चालु आर्थिक वर्षको साउन महिनादेखि फागुन तेस्रो सातासम्म उक्त संख्यामा उजुरी दर्ता भएका हुन् ।

उनले दर्ता भएका उजुरी मध्य छ सय ७९ उजुरी फछ्र्याैट भइसकेको र पाँच सय १९ उजुरी अनुसन्धानकै क्रममा रहेको बताए । 

अख्तियारमा समाचार पत्र मार्फत तीन उजुरी, लिखितका निवेदन दुई सय ८६ उजुरी, इमेल मार्फत तीन सय छ उजुरी, फेसबुक मार्फत १० उजुरी, भाइबर मार्फत १० उजुरी, आयोगको वेवसाइट मार्फत एक सय ८६ उजुरी, टेलिफोन मार्फत एक सय ४८ उजुरी, हुलाक सेवा मार्फत दुई सय ४४ उजुरी, अन्य स्रोत मार्फत सात उजुरी, प्रमुख जिल्ला अधिकारी मार्फत पाँच उजुरी र हेलो सरकार मार्फत दुई उजुरी दर्ता भएका छन् ।

सूचना अधिकारी भट्टका अनुसार सबै भन्दा बढी उजुरी कैलालीबाट दर्ता भएका छन्  भने सबै भन्दा कम उजुरी डडेल्धुरा, बझाङ र डोटीबाट दर्ता भएका छन् ।

कैलालीबाट दुई सय ५१ उजुरी दर्ता भएका छन् । दर्ता भएका उजुरी मध्य गत आर्थिक वर्ष २०८०÷०८१ बाट सरेर आएका ६८ उजुरी र नयाँदर्ता भएका एक सय ८३ उजुरी हुन् । डडेल्धुरा, बझाङ र डोटीबाट ७९÷७९ उजुरी दर्ता भएका छन् ।

सूचना अधिकारी भट्टका अनुसार गत आर्थिक वर्ष सरेर आएका डडेल्धुराका उजुरी १९ वटा र नयाँ दर्ता भएका ६० उजुरी छन् भने बझाङका २६ उजुरी सरेर आएका र ५३ उजुरी नयाँ दर्ता भएका छन् ।

डोटीका ३८ उजुरी गत वर्षको सरेर आएकोमा र ४१ उजुरी नयाँ दर्ता भएका हुन् । बाजुराबाट एक सय ५६ उजुरी दर्ता भएका थिए, भने दर्ता भएका उजुरी मध्य ८३ उजुरी सरेर आएकोमा ७३ उजुरी नयाँ दर्ता भएका हुन् । 

अछामबाट एक सय ७४ उजुरी दर्ता भएको सूचना अधिकारी भट्टले बताए । यसमध्य गत आर्थिक वर्ष सरेर आएका ८५ उजुरी र ८९ नयाँ उजुरी दर्ता भएको उनको भनाइ छ । 

उनका अनुसार कञ्चनपुरबाट एक सय ५१ उजुरी दर्ता भएका छन् । यस मध्य ५७ उजुरी सरेर आएकोमा ९४ उजुरी नयाँ दर्ता भएका हुन् । बैतडीबाट एक सय १७ उजुरी दर्ता भएका थिए, भने यसमध्य सरेर आएको ६२ उजुरी र ५५ नयाँ उजुरी दर्ता भएका हुन् । 

दार्चुलाबाट एक सय १२ उजुरी दर्ता भएको सूचना अधिकारी भट्टले बताए । यसमध्य ५९ उजुरी गत आर्थिक वर्षका सरेर आएको र ५३ उजुरी नयाँ दर्ता भएको उनले बताए । 

प्रदेशका नौ वटै जिल्लाहरूमा भएका भ्रष्टाचारका उजुरीहरू अख्तियार दुरुपयोग अनुसन्धान आयोग, महेन्द्रनगरको कार्यालयमा दर्ता हुने गरेका छन् । अख्तियारले उजुरीको प्रकृतिका आधारमा छानबिन गर्दै आएको छ ।