कैलालीमा घरेलु हिंसाका घटनामा वृद्वि

धनगढी । कैलालीमा दिन प्रतिदिन घरेलु हिसांका घटना बढ्न थालेका छन । कुटपिट, सम्वन्ध विच्छेद, मानसिक यातना, गालीगलौज, नागरिकता, जन्मदर्ता लगायतका घरेलु हिंसाका घटनाहरु बढ्न थालेका हुन् ।

जिल्ला प्रहरी कार्यालय कैलालीमा चालु आर्थिक वर्ष २०८१÷०८२ को आठ महिनामा दुई सय ३५ घरेलु हिंसाका उजुरी दर्ता भएको कैलाली प्रहरी कार्यालयकी महिला सेल प्रमुख प्रहरी निरीक्षक कल्पना पौडेलले जानकारी दिइन् । 

यसमध्ये दुई सय १९ जनालाई मिलापत्र गरी घर पठाइएको थियो भने १६ उजुरी सम्बन्धीत निकाय (कैलाली अदालत) मा पेश गरेको प्रहरी निरीक्षक पौडेलले बताइन् । गत आर्थिक वर्ष २०८०÷०८१ को तुलनामा चालु आर्थिक वर्ष २०८१÷०८२ को आठ महिनामा दुई सय ७० उजुरी दर्ता संख्या कम हो । 
उनका अनुसार गत आर्थिक वर्ष २०८०÷०८१ मा पाँच सय पाँच उजुरी दर्ता भएकोमा चार सय ७४ उजुरी मिलापत्र भएको र ३१ उजुरी कैलाली अदालतमा पेश भएका थिए । 

आर्थिक वर्ष २०७९÷०८० मा तीन सय ८३ उजुरी दर्ता भएकोमा तीन सय ६० उजुरी मिलापत्र भएको थियो, भने २३ उजुरी अदालत पठाएको महिला सेल प्रमुख प्रहरी निरीक्षक पौडेलको भनाइ छ । 

यस्तै आर्थिक वर्ष २०७८÷०७९ मा चार सय ६० उजुरी दर्ता भएकोमा चार सय ३९ उजुरी मिलापत्र भएको थियो, भने २१ उजुरी कैलाली अदालत पठाएको पठाइएको कैलाली प्रहरी कार्यालय महिला सेलले जनाएको छ । 

महिला सेल प्रमुख प्रहरी निरीक्षक पौडेलले पहिला हिंसामा परेका महिलाहरु खुलेर बाहिर आउन नचाहने गरेको भएपनि अहिले शिक्षित भएसँगै प्रहरीमा आउने गरेकाले गर्दा उजुरीको संख्या बढेको बताइन् ।

उनले भनिन, ‘अहिले मानिस शिक्षित भए । पहिलाको जस्तो हिंसा सहदैनन् । पहिला हिंसामा परेपछि सहेर बस्नु पथ्यो । प्रहरीमा आउन जाँदैनथ्य । अहिलेका मान्छेहरु शिक्षित पनि भए उनीहरुलाई हिंसा सहनु हुँदैन । प्रहरीमा जानुपर्छ । शिक्षाले गर्दा पनि होला । जनचेतनाको स्थर पनि बढेको हो की ? 

आफूहरुले विद्यालय लगायत समुदायहरुमा लैंगिक हिंसा सम्बन्धी विभिन्न कार्यक्रमहरु गर्दै जनचेतना फैलाउने कामहरु गरिरहेको उनले बताइन् । मानिसहरुमा जनचेतनाको विकासले गर्दा पनि पहिला भन्दा अहिले खुलेर बाहिर आउने गरेकाले घरेलु हिंसाका घट्ना बढेको उनको भनाइ छ । 

अहिले मानिसहरु स–सानो कुरामा पनि प्रहरी समक्ष पुग्ने गरेको उनले बताइन् । अहिले बढ्दो सामाजिक सञ्चालको दुरुप्रयोगले गर्दा पनि घरेलु हिंसाका घट्ना बढेको हुन सक्ने उनको ठम्याई छ ।