आमाको पुण्यतिथिमा सुदूरपश्चिम टाइम्सका संचालक ऐडीद्वारा सेभ हाउस र गौशालालाई सहयोग

धनगढी । सुदूरपश्चिम टाइम्सका संचालक तथा पत्रकार रमेश ऐडीले स्वर्गीय आमाको तेस्रो पुण्यतिथिको अवसरमा सामाजिक सेवाका विभिन्न कार्य गरेका छन्।

उनले स्वर्गीय माता विस्ना देवी ऐडीको सम्झनामा अत्तरियाको महिला तथा बालबालिका सेभ हाउस र धनगढी–१८ फूलवारीस्थित गौशाला लाई आवश्यक सामग्री सहयोग प्रदान गरेका हुन्।

आमाको स्मृतिलाई सेवामा रूपान्तरण गर्ने उद्देश्यले ऐडीले सेभ हाउसलाई १० हजार रुपैयाँ बराबरको खाद्यान्न तथा गौशालालाई ५ कट्टा ढिके नुन हस्तान्तरण गरेका छन्।

सेभ हाउसलाई सहयोग हस्तान्तरण समारोहमा पत्रकार महासंघ कैलालीका अध्यक्ष श्रवण देउवा, बझाङका अध्यक्ष ललितबहादुर सिंह, प्रेस युनियनका केन्द्रीय सदस्य पुष्पराज जोशी, प्रदेश उपाध्यक्ष टेकेन्द्र देउवा लगायत वरिष्ठ पत्रकारहरूको विशेष उपस्थिति रहेको थियो।

रमेश ऐडीले आमाको स्मृतिमा हरेक वर्ष फागुन २९ गते विभिन्न परोपकारी कार्य गर्दै आएका छन्। पहिलो पुण्यतिथिमा उनले मानव सेवा आश्रमलाई सहयोग गरेका थिए भने दोस्रो पुण्यतिथिमा दृष्टि फाउन्डेशनमा भोजन वितरण गरेका थिए। उनले आमाले संसार छोडेको दिनलाई सामाजिक सेवाको दिनका रूपमा स्थापित गर्ने लक्ष्य राखेको बताए।

अत्तरियास्थित सेभ हाउसमा घरवारविहीन ४० भन्दा बढी बालबालिकाहरू आश्रित छन्। उनीहरूको पालनपोषण विभिन्न दातृ व्यक्तिहरूबाट प्राप्त सहयोगमा निर्भर छ।

गौशालालाई ढिके नुन हस्तान्तरण कार्यक्रममा धनगढी–१९ का वडा सदस्य हरेन्द्र ऐडी को विशेष उपस्थिति रहेको थियो भने सहयोग गौशालाका अध्यक्ष यादव प्रसाद भण्डारीले ग्रहण गरेका थिए।