धनगढीको मोहना नदीमा डुबेर दुईको मृत्यु

धनगढी । धनगढीको मोहना नदीमा नुहाउने क्रममा डुबेर दुई जनाको मृत्यु भएको छ। धनगढी उपमहानगरपालिका–१९ फुलबारी गाउँस्थित मोहना नदीमा नुहाउने क्रममा सोही ठाउँ बस्ने १५ वर्षीय दिनेश ओझा र १६ वर्षीय आसिस ओझाको मृत्यु भएको छ। दुई जना भने घाईते भएका छन्।

सोही ठाउँ बस्ने १६ वर्षीय करन सिंह धामी र १५ वर्षीय अदर्श पुजारा घाईते भएका छन्। घाइते दुबै जनाको सेती प्रादेशिक अस्पतालमा उपचार भईरहेको प्रहरीले जनाएको छ।

चारै जना शुक्रवार नुहाउन गएकोमा नुहाउने क्रममा डुबेका थिए। डुबेका चार जना मध्ये दुई जनालाई सकुशल उद्दार गरिएको र दुई जनालाई घटनास्थलबाट अन्दाजी ३० मिटर दक्षिण नदिमा मृत अवस्थामा फेला पारेको जिल्ला प्रहरी कार्यालय कैलालीले जनाएको छ।

उनीहरुलाई जिल्ला प्रहरी कार्यालय कैलाली र सशस्त्र प्रहरी बल फुलबारीबाट संयुक्त रुपमा खटिइ खोजतलास गरिएको थियो।