बजेट कार्यान्वयन गर्न सके मात्र दिगो विकास सम्भव : मुख्यमन्त्री शाह

धनगढी । सुदूरपश्चिम प्रदेशका मुख्यमन्त्री कमलबहादुर शाहले बजेट निर्माणसँगै बजेट विनियोजन र कार्यान्वयनलाई प्रभावकारी रूपमा सञ्चालन गर्न सके मात्र दिगो विकास सम्भव हुने बताएका छन ।

बिहीबार राष्ट्रिय योजना आयोगले धनगढीमा आयोजना गरेको सोहौं योजनाको कार्यान्वयन, समपूरक तथा विशेष अनुदान र बहुक्षेत्रिय पोषण योजना लगायतका विषयमा प्रदेश र स्थानीय तह लक्षित दुई दिने अन्तरक्रिया कार्यक्रममा उनले सो कुरा बताएका हुन ।

कार्यक्रमका प्रमुख अतिथि मुख्यमन्त्री शाहले समग्र सुदूरपश्चिम प्रदेशलाई समृद्ध बनाउने खालका योजना बनाउन संघ सरकारसँग कुरा भएको बताए ।

उनले सुदूरपश्चिममा जलविद्युतको सम्भावना रहेकोले संघ सरकारले उक्त योजना अगाडि बढाएमा पूर्ण लगानीको वातावरण सुदूरपश्चिम सरकारले मिलाउने बताए ।

स्थानीय सरकार र प्रदेश सरकारले एक अर्काको अस्तित्व स्विकार्न गरी संघ–प्रदेश, प्रदेश–स्थानीय र संघ–स्थानीय बिचको सहकारिता, सहभागिता र सहअस्तित्वलाई आत्मसाथ गरी शासकीय प्रक्रियामा जानुपर्ने उनले बताए ।