एसईई दिएर पौडी खेल्न गएका किशोरको डुबेर मृत्यु

काठमाडौं । गोरखाको बुढीगण्डकी नदीमा पौडी खेल्ने क्रममा डुबेर एक किशोरको मृत्यु भएको छ। आरुघाट गाउँपालिका-१ का १६ वर्षीय युनिश गुरुङको मृत्यु भएको हो।

जिल्ला प्रहरी कार्यालय गोरखाका प्रहरी नायब उपरीक्षक इन्द्रप्रसाद सुवेदीका अनुसार युनिश आरुघाट गाउँपालिका-४ स्थित थुमीमा एसईई दिएर बुधबार अपराह्न बुढीगण्डकी नदीमा पौडी खेल्न गएका थिए।

खोजीका क्रममा साँझ स्थानीय र प्रहरीको संयुक्त टोलीले बगाएको स्थानदेखि करिब एक किलोमिटर तल उनलाई मृत फेला पारेको सुवेदीले बताए।

उनको शवलाई पोष्टमार्टमका लागि राति नै जिल्ला अस्पताल गोरखामा लगिएको जिल्ला प्रहरीले जनाएको छ।