चितुवाको आक्रमणबाट बाजुरामा बालकको मृत्यु

बाजुरा । बाजुरामा चितुवाको आक्रमणबाट एक बालकको मृत्यु भएको छ । जिल्लाको खप्तड छेडेदह गाउँपालिका–३ धुर्तोलामा चितुवाको आक्रमणबाट ८ वर्षीय विजय रावतको मृत्यु भएको हो ।

आइतबार साँझ घर नजिकै आँगनमा खेलिरेहको समयमा रावतलाई चितुवाले आक्रमण गरेको प्रहरीले जनाएको छ ।

जिल्ला प्रहरी कार्यालयका प्रहरी निरीक्षक देवबहादुर चौधरीले चितुवाको आक्रमणबाट बालकको घटनास्थलमै मृत्यु भएको बताए ।

मृतकको शव परीक्षणका लागि जिल्ला अस्पताल बाजुरा ल्याइएको छ । घटना पश्चात् स्थानीयमा त्रास फैलिएको छ ।

प्रहरी तथा वन विभागको टोली घटनास्थलमा पुगेर अनुसन्धान गरिरहेको जनाएको छ ।