उच्च अदालतको आदेशछि रवि लामिछाने घरबाटै पक्राउ

रास्वपाका सभापति रवि लामिछाने पक्राउ परेका छन् ।  उच्च अदालत तुलसीपुरको बुटवल इजलासले सुप्रिम बचत तथा ऋण सहकारी ठगी प्रकरणमा लामिछानेलाई पुर्पक्षका लागि थुनामा पठाउने आदेश दिएसँगै शुक्रबार राति प्रहरीले निवासबाटै पक्राउ गरेको हो । 

प्रहरी टोली उनलाई पक्राउ गर्न हात्तीगौडास्थित निवासमा पुगेको थियो । आवश्यक प्रक्रिया पूरा गरेर उनलाई नियन्त्रणमा लिएको प्रहरी प्रधान कार्यालयका एक अधिकारीले जानकारी दिए । 

यसअघि लामिछानेले फेसबुकमार्फत आजै आफूले गिरफ्तारी दिने बताएका थिए । 

उनले भनेका थिए, ‘सम्मानित अदालतको आदेशको सम्मान गर्दै म आफै आजै अहिले नै  गिरफ्तारी दिँदैछु।  साथै  न्यायालयका अन्य ढोकाहरू मेरा लागि खुला होलान् नै । न्यायका लागि दुनियाँका सबै ढोका ढकढकाउँछु ।’ यद्यपि उनले आफूमाथि ठुलो अन्याय भएको बताएका छन् ।