बझाङको थलारा–५ का तीन गाउँ सील गर्ने निर्णय

धनगढी
 एकै दिन १० जना कोरोना संक्रमित फेलापरेपछि बझाङको थलारा गाउँपालिका वडा नम्बर–५ अन्तरगतका तीन वटा गाउँलाई सील गर्ने निर्णय गरिएको छ । 
 शनिबार एकैदिन १० जनामा कोरोना संक्रमण पुष्टी भएपछि बझाङको थलारा गाउँपालिका वडा नम्बर–५ अन्तरगत पर्ने दुवाली, ठाडा गाउँ र सार्की गाउँलाई साउन १९ गते राती १२ बजे देखी सील गर्दै सो ठाउँमा निषेधाज्ञा जारी गर्ने निर्णय गरिएको बझाङका प्रमुख जिल्ला अधिकारी कमलराज भण्डारीले बताए । क्वारेण्टाईनबाट घर गएपछि कोरोना संक्रमण पुष्टी भएपछि तीन गाउँलाई सील गरी गाउँका सवैको स्वास्थ्य परिक्षण गर्ने तयारी भइरहेको प्रजिअ भण्डारीले बताए । 
 यसै गरी बझाङकै केदारस्यू गाउँपालिका–६ र ७ का वडालाई पनि साउन १९ गते राती १२ बजे देखी सिल गर्ने निर्णय गरिएको छ । ती दुई वटा गाउँमा शुक्रबार र शनिबार गरी ६६ जनामा कोरोना संक्रमण पुष्टी भएको थियो । कोरोना संक्रमण पुष्टी भएका ६६ जना क्वारेण्टिनबाट घर गएपछि कोरोना संक्रमण पुष्टी भएको हो । शनिबारनै सवै वडालाई सील गर्ने तयारी गरेपनि प्रदेश सरकार संग आवश्यक समन्वय गर्नुपर्ने भएका कारण १९ गते देखी सील गर्ने निर्णय गरिएको प्रजिअ भण्डारीले बताए । 
 यसै गरी कोरोना संक्रमितको संख्या बढेको भन्दै भीमदत्त नगरपालिकाले वडा नम्बर– १३ लाई शनिबार राती देखीनै सिल गरिएको छ । वडा कार्यालयले कोरोनाको जोखिमलाई मध्यनजर गर्दै शनिबार राति १२ बजेदेखि एक साताका लागि सिल गर्ने भएको हो । शनिबार सो वडाका ६ जनामा कोरोना संक्रमण पुष्टी भएको थियो ।