कैलालीको गौरीगंगा नगरपालिका प्रमुख प्रशासकीय अधिकृतमाथि कुटपिट, आन्दोलनमा कर्मचारी

धनगढी । कैलालीको गौरीगंगा नगरपालिकामा प्रमुख प्रशासकीय अधिकृतमाथि कुटपिट भएको छ । प्रमुख प्रशासकीय अधिकृत धर्मानन्द जोशीमाथि बिहीबार दिउँसो कुटपिट भएको हो ।

नगर प्रमुख देविदत्त कँडेलका सहयोगी उमेश जोशीले कुटपिट गरेको आरोप लागेको छ । प्रमुख प्रशासकीय अधिकृत कुटिएपछि गौरीगंगा नगरपालिका कर्मचारी आन्दोलित भएका छन् ।

कर्मचारीको सुरक्षाको प्रत्याभूति नभएसम्मका लागि अत्यावश्यक सेवाबाहेक अन्य सेवाहरू स्थगित गरिएको कर्मचारीहरूले जारी गरेको विज्ञप्तिमा भनिएको छ । 

‘साउन १ गतेका दिन गौरिगंगा नगरपालिकाका प्रमुख प्रशासकीय अधिकृत धर्मानन्द जोशीमाथि कार्यकक्षभित्रै भएको कुटपिट तथा अभद्र व्यवहारप्रति हामी यस नगरपालिकाका सबै कर्मचारीहरू गहिरो दुःख प्रकट गर्दै घोर भर्त्सना गर्दछौँ,’ विज्ञप्तिमा भनिएको छ, ‘सार्वजनिक कार्यालयको मर्यादा भंग गर्ने यस्ता अमानवीय क्रियाकलापले सम्पूर्ण कर्मचारी समुदायमा भय, त्रास र असुरक्षाको वातावरण सिर्जना भएको छ ।

कार्यालय तथा कार्यकक्षजस्तो सुरक्षित ठानिएको स्थानमै कर्माचारीमाथि कार्यालय समयमा नै आक्रमण हुनु निन्दनीय छ । यसले राज्यको कर्मचारी सुरक्षाप्रतिको प्रतिबद्धतामाथि प्रश्न उठाएको छ । भविष्यमा यस्ता लज्जास्पद र अमर्यादित अमानवीय प्रकृतिका क्रियाकलाप गर्ने दुस्साहस नगरियोस् ।

यस घटनाको तत्काल, निष्पक्ष छानबिन गरी दोषीलाई कानुनी कारबाही गरी कर्मचारीहरूलाई सुरक्षित तबरले काम गर्ने वातावरण सिर्जना गर्न सम्बन्धित पक्षसँग जोडदार माग गर्दछौँ ।’

कुटपिटको कारण भने खुलेको छैन । मेयर कँडेल र प्रमुख प्रशासकीय अधिकृतबीच केही समयदेखि विवाद रहेको बताइएको छ । ‘हाकिमसापको कार्यशैलीप्रति मेयरसाप पहिलेदेखि नै खुसी थिएनन्,’ गौरीगंगा नगरपालिकाका एक कर्मचारीले भने, ‘उहाँ (प्रमुख प्रशासकीय अधिकृत) ले काम गर्दा सल्लाह नगर्ने र एकलौटी रूपमा काम गर्दै आउनुभएको थियो । त्यही विवाद बढेको हुनसक्छ ।’

बिहीबार वडासचिवको सरुवा र कर्मचारीको तह मिलानलगायतका विषयमा छलफल गर्न मेयर कँडेलले प्रमुख प्रशासकीय अधिकृत जोशीलाई आफ्नो कार्यकक्षमा बोलाएका थिए ।

‘दुईपटक बोलाउँदा पनि हाकिमसाप मेयरसापलाई भेट्न जानु भएन,’ ती कर्मचारीले भने, ‘त्यसपछि मेयर सापका सहयोगी उमेश जोशी बोलाउन जाँदा हातपातको अवस्था सिर्जना भएको हो ।’

आफूमाथि कुटपिट भएपछि प्रमुख प्रशासकीय अधिकृत जोशी कैलालीका प्रमुख जिल्ला अधिकारी गोगन हमाललाई भेट्न पुगेका छन् । ‘अहिले सीडीओसापसँग छलफल भइरहेको छ, घटनाबारे पछि कुरा गरौँला,’ प्रमुख प्रशासकीय अधिकृत जोशीले भने ।