बिच्छयामा आएको बाढीले १८ घरमा क्षेति, दुई दर्जन घर र सरकारी कार्यलय जोखिममा

धनगढी । बाजुराको बिच्छ्यामा आएको बाढीले आसपासका १८ वटा घर पुर्ण रुपमा क्षति भएका छन  । अविरल बर्षाले बुधवार हिमाली गाउँपालिका १ अन्तर्गत बिच्छ्या खोलामा आएको बाढीले भौतिक क्षति भएको हो ।
जिल्ला प्रहरी कार्यालय बाजुराका अनुसार बाढीले बिच्छ्यामा ७ घर र कुवाडीमा ११ घर गरी १८ वटा घर पूर्ण रुपमा क्षति भएका छन् । सो बाढीका कारण दुई दर्जन बढी घर सहित सरकारी संरचनाहरु उच्च जोखिममा रहेका छन् । बाढीले केही घर बगाएको छ भने केही पुरिएका छन् । तर मानविय क्षति भने भएको छैन् ।
अविरल बर्षापछि आएको बाढीका कारण वडा नम्बर १ बस्ने नरेन्द्र बहादुर बुढा, छन्चलाल थापा, धनसिंह थापा, सब्बले थापा, लालबहादुर थापा, सुजलाल थापा र गोतल थापाको घर पूर्ण रुपमा क्षति भएका छन् ।  घर, पसल सहित खेतबारीमा पूर्ण रुपमा क्षति भएको जिल्ला प्रहरी कार्यालयका सूचना अधिकारी देवबहादुर चौधरीले बताए । उनका अनुसार उक्त खोलामा आएको बाढीका कारण सोही ठाउँका १७ वटा घर उच्च जोखिममा रहेका छन् ।
त्यस्तै बाढीबाट हिमाली गाउँपालिका १ को वडा कार्यालय भवन, बिच्छ्या मावि, बिच्छ्या स्वास्थ्य चौकी, झोलङ्गे पुल सहित विद्युत लाइन समेत उच्च जोखिममा रहेका छन् । त्यसै गरि सोही बिच्छ्या खोलामा आएको बाढीले वडा नम्बर ५ कुवाडीमा पनि करिब एक दर्जन घरहरु बगाएको प्रहरीले जनाएको   छ ।
जिल्ला प्रहरी कार्यालयका सूचना अधिकारी चौधरीका अनुसार वडा नम्बर ५ बस्ने नवराज बुढथापा, देवीलाल चदारा, बिरमल चदारा, अजय चदारा, अङ्गविर चदाराको घर बाढीले बगाएको छ । त्यस्तै बल बहादुर चदारा, मुगा लुहार, देविलाल बुढथापा, विरभान लुहार र डबल लुहारको घर कुवाडी खोलामा आएको बाढीले बगाएर क्षति भएको उनले बताए ।  बिच्छ्यामा फोन सम्पर्क समेत नहुँदा पनि थप समस्या भएको स्थानीयले बताएका छन् । बाजुराका प्रमुख जिल्ला अधिकारी मेघनाथ पाध्याले अकस्मात् आएको बाढीले बिच्छ्या र कुवाडीमा ठूलो भौतिक क्षति  भएको बताए । उनले अझै क्षतिको विवरण संकलन भईरहेको बताए ।