हाजिरी गर्छन, तर संसद बैठकमा देखिदैनन् नागरिका उन्मुक्तिका सांसद

नागरिक उन्मुक्ति पार्टी (नाउपा) ले गत असार २१ गतेसरकारलाई दिएको समर्थन फिर्ता लिने निर्णय गरयो । त्यसको भोलिपल्टै पार्टीले सभामुख देवराज घिमिरेलाई पत्राचार गर्दै प्रतिपक्षमा बस्ने बतायो ।

सरकारलाई दिएको समर्थन फिर्ता लगेपछि उन्मुक्तिकी पार्टी अध्यक्ष रञ्जिता श्रेष्ठ नियमित रूपमा प्रतिपक्षको बेञ्चमा बस्न थालिन् । तर उन्मुक्तिकै तीन सांसद भने त्यसपछि  संसदमा देखिएका छैनन् । सांसद गंगाराम चौधरी र लालबिर चौधरी न त सत्ता पक्षको बेञ्चमा देखिएका छन्, न त प्रतिपक्षमा बसेका छन् ।

तर  उन्मुक्ति पार्टीका तीन संसदको रेकर्डमा ‘उपस्थित’ भएको देखिन्छन् ।  पार्टीले सरकारबाट समर्थन फिर्ता लिएको एक महिनासम्म यी प्रतिनिधिको उपस्थिति हाजिरी रेकर्डमा मात्रै सिमित छ ।

संसदीय दलका नेता गंगाराम चौधरी, सांसदहरु लालबिर चौधरी र संस्कृति, पर्यटन तथा नागरिक उड्डयन राज्यमन्त्री समेत रहेका अरुणकुमार चौधरी संसद वैठकमा नदेखिने तर संसद सचिवालयको हाजिरी किताबमा भने नियमित हाजिरी गरिरहेका छन् ।

संस्कृति, पर्यटन तथा नागरिक उड्डयन राज्यमन्त्रीको जिम्मेवारीमा रहेका चौधरी सरकारको समर्थन फिर्ता भएपछि मन्त्रालयमा देखिन छाडेका छन् । मन्त्रालय स्रोतका अनुसार उनी केही दिन मन्त्रालय आएका थिए, तर त्यसयता पुरै बेपत्ता छन् । तर राजिनामा भने दिएका छैनन् । सबै सरकारी सेवा, सुविधा निरन्तर रूपमा उपभोग गरिरहेका छन् ।

पर्यटन मन्त्रालय उच्च स्रोत भन्छ, ‘उहाँले राजिनामा दिएको भन्ने सुनेको मात्रै हो, आधिकारिक रूपमा केही छैन ।’

प्रधानमन्त्रीका मुख्य सल्लाहकार विष्णु रिमालसमेत जानकार छैनन् । उनले भने, ‘मलाई जानकारी छैन, राजिनामा आएको भए मलाई थाहा छैन ।’