इम्बोस्ड नम्बरको व्यवस्था हटाउन माग गर्दै ज्ञापन

धनगढी । सरकारले इम्बोस्ड नम्बर प्लेट अनिवार्य गरेपछ सो वयवस्था हटाउन माग गर्दै जिल्ला प्रशासन कार्यालय कैलालीमा ज्ञापन पत्र बुझाइएको छ । देवनागरी लिपि हटाइ इम्बोस्ड नम्बर प्लेट अनिवार्य जडान गर्नुपर्ने सरकारको निर्णयको विरोध गर्दै प्राज्ञिक विद्यार्थी परिषद् नेपालले जिल्ला प्रशासन कार्यालयका प्रमुख कृष्णप्रसाद लम्साललाई ज्ञापन पत्र बुझाएको हो ।

परिषद्को देशभरका जिल्ला प्रशासन कार्यालयका प्रमुख मार्फत ज्ञापन पत्र बुझाउने अभियान अन्तर्गत परिषद्का राष्ट्रिय सचिव प्रेम बोहोराको नेतृत्वमा ज्ञापन पत्र बुझाइएको थियो । प्राज्ञिक विद्यार्थी परिषद् नेपालले नेपाल सरकार यातायात व्यवस्था विभागले जारी गरेको निर्णय तुरुन्तै खारेज गर्दै देवनागरी लिपिमा नै इम्बोस्ड नम्बर राख्न माग गरेको छ ।

यातायात व्यवस्था विभागले असोज १ गते देखि अनिवार्य रूपमा सबै सवारी साधनहरूमा अङ्ग्रेजी भाषाको रोमन लिपिमा लेखिएको इम्बोस्ड नम्बर प्लेट राखी सक्नु पर्ने निर्णय गरेको छ । उक्त निर्णयको विरोध गर्दै प्राज्ञिक विद्यार्थी परिषद्ले देशभरका जिल्ला प्रमुख मार्फत ध्यानाकर्षण गर्न ज्ञापन पत्र बुझाइरहेको छ ।