धनगढीको मुख्य शहरी क्षेत्र डुबानमा

धनगढी

गए रातिदेखिको अबिरल बर्षापछि पानी भरिएपछि धनगढी उपमहानगरपालिकाको मुख्य शहरी क्षेत्रका अधिकांश क्षेत्र डुवानमा परेका छन् ।

धनगढीको क्याम्पस रोड, शिवनगर, एलएनचोक, पार्कचोक, बिशालनगर, मिलनचोक, चौराह, उत्तरबेहडी, चटकपुर लगायतका अधिकाशं शहरी क्षेत्रमा डुवान भएको हो  ।

वडा नम्बर ७ को मनेहरा, मोतिचोक, भानुचोक क्षेत्र, वडा नम्बर १२ को मनेहरा मुक्त कमैया बस्तीमा पानी भरिएको छ । मुक्त कमैया बस्तीका १ सय ५० घरमा पानी पसेकोे वडा अध्यक्ष गणेशराज जोशीले जानकारी दिए । अध्यक्ष जोशीले स्काभेटरले सडक किनारका नालीहरु थुप्रिएको माटो हटाएर पानीलाई निकास दिने काम भइरहेको बताए ।

मुक्त कमैया शिबिर र कम्पनी गाउँको बीचमा रहेको कालिका मन्दिरको नर्सरीमा रहेका चार वटा सिंसौंका रुख ढल्दा ५ घण्टा बाटो अवरुद्ध भएको थियो । डोजरको प्रयोग र स्थानीयहरुको सहयोगमा रुखहरु हटाएर ११ बजेदेखि बाटो सञ्चालन गरिएको वडा अध्यक्ष जोशीले जानकारी दिए ।

जिल्ला प्रहरी कार्यालय कैलालीका प्रहरी निरिक्षक हिक्मत थापाले बाढी बस्तीमा पसेपछि झण्डै तीन सय घरमा पानी पसेको बताए। ‘बजार क्षेत्र जलमग्न भएको र तीन सय घरमा पानी पसेको जानकारी आएको उनले बताए । हालसम्म ५५ घरमा क्षति पुगेको बिबरण प्राप्त भएके बाँकी बिबरण प्राप्त नभएको जिल्ला प्रहरी कार्यालयका  सह–प्रवक्ता समेत रहेका प्रहरी निरिक्षक थापाले बताए ।