लागु औषध बोकेका एक युवती सहित तीन जना पक्राउ

कैलाली र कन्चनपुर जिल्लाबाट प्रहरीले लागु औषध सहित तीन जनालाई पक्राउ गरेको छ । प्रहरीले कैलालीको टीकापुर नगरपालिबाबाट दुई युवक र कन्चनपुरको भीमदत्त नगरपालिकाबाट एक युवतीलाई लागु औषध सहित शनिबार पक्राउ गरेको हो ।

सुदुरपश्चिम प्रदेश  प्रहरी कार्यालय धनगढीका अनुसार टिकापुर नगरपालिका ९ खक्रौला भन्सार चेकपोष्ट स्थित बा ७५ प ८९२९ नम्बरको मोटरसाइकललाई शंका लागि चेकजाँच गर्दा मोटरसाइकलको हेड लाइटको कबर भित्र लुकाई छिपाई राखेको अवस्थामा ४ ग्राम ९७० मिलिग्राम लागु औषध खैरो हेरोइन सहित दुई जनालाई पक्राउ गरिएको छ । पक्राउ पर्नेमा मोटसाइकल चालक जानकी गाउपालिका ९ अमरावतीका २२ बर्षी टेक बहादुर साउँद र मोटरसाइकल पछाडी सवार सोही ठाउँका २५  बर्षीय रमेश टमटा रहेका छन् ।

त्यस्तै कन्चनपुरको भीमदत्त नगरपालिका ९ झिलमिलाबाट  २२० मिलिग्राम लागुऔषध (खैरो हेरोइन जस्तो देखिने धुलो पदार्थ ) फेला पारी एक युवतीलाई पक्राउ गरिएको छ । शंका लागि चेकजाँच गर्दा लागु औषध सहित कैलालीको गौरीगंगा नगरपालिका १ चौमालाकी  ३६ बर्षीय लक्ष्मी देबि बिष्टलाई पक्राउ गरिएको  सुदुरपश्चिम प्रदेश प्रहरी कार्यालय धनगढीले जनाएको छ ।