बाल्मिकी  +  २ राइजिङ स्टार प्रिमियर लिग २०८२ को ट्रफी सार्वजनिक

धनगढी । बाल्मिकी + २ राइजिङ स्टार प्रिमियर लिग २०८२ को ट्रफी आज ( शनिबार) सार्वजनिक गरिएको छ ।  मंसिर १८ गतेदेखि अण्डर ८ अन्तर बिद्यालय क्रिकेट प्रतियोगिातको शुरु हुने उक्त प्रतियोगिताको ट्रफी एक कार्यक्रमका बीच  सार्वजनिक गरिएको हो ।

प्रतियोगिताका मुख्य प्रायोजक बाल्मिकी इन्टरनेशनल स्कुलका अध्यक्ष दिनेशराज भण्डारी र हस्पिटल पार्टनर निसर्ग हस्पिटल एण्ड रिसर्च सेन्टरका अध्यक्ष तीर्थ पन्तले ट्रफी सार्वजनिकीकरण गरेका हुन् ।

बिद्यालय स्तरको क्रिकेटको बिकास गर्ने उदेश्यले राइजिङ स्टार बोर्डिङ स्कुलले कक्षा ८ सम्म अध्ययनरत बिद्यार्थीहरुको अन्तरबिद्यालय क्रिकेट प्रतियोगिता आयोजना गर्न लागेको हो । धनगढी ६ मटियारीमा रहेको श्रीकृष्ण सामुदायिक वनको खेल मैदानमा  सँचालन हुने उक्त प्रतियोगितामा कैलाली र कन्चनपुरका २४ बिद्यालयहरुको सहभागिता रहनेछ ।

बाल्मिकी  +  २ राइजिङ स्टार प्रिमियर लिगका कार्यकारी निर्देशक  कलेन्द्र शाहीले  विद्यालय स्तरको प्रतियोगिताले नयाँ खेलाडी उत्पादनमा ठुलो टेवा पुग्ने बताए ।  क्रिकेटको सहरमा क्रिकेटको माहौल कम भएपछि विद्यालयस्तरीय प्रतियोगिता आयोजना गर्न लागिएको उनले बताए ।

बाल्मिकी इन्टरनेशनलका अध्यक्ष दिनेशराज भण्डारीले  ग्रास रुटबाट उदाएका क्रिकेट खेलाडीहरू अहिले राष्ट्रिय अन्तर्राष्ट्रियस्तरमा पुगेको बताउँदै आफूहरूले प्रायोजन  गर्न लागेको प्रतियोगिताले थप खेलाडीहरू उत्पादन हुने विश्वास व्यक्त गरेका थिए ।

निसर्ग हस्पिटलका अध्यक्ष तीर्थ पन्तले   स्वास्थ्य सेवामा आफुहरुले काम गरिरहेको भए पनि सामाजिक क्षेत्रमा पनि योगदान पुरयाउन ग्रासरुटको क्रिकेटमा सहयोग गर्न लागेको बताए ।

राइजिङ स्टार बोर्डिङ स्कुलका प्रिन्सिपल हरिश शाहीले प्रतियोगिताको तीव्र तयारी भइरहेको भन्दै क्रिकेटको सहरमा  क्रिकेटको उत्सव हुन लागेको बताए ।

a