सुदूरपपिश्चमका विभिन्न स्थानमा गएको पहिरोमा परी १० को मृत्यु

धनगढी

 मंगलबार राती देखी भएको अविरल बर्षाका कारण सुदूरपश्चिमका विभिन्न स्थानमा पहिरो जाँदा पहिरोमा पुरिएर १० जनाको मृत्यु भएको छ ।

 मंगलबार राती देखी आएको अबिरल बर्षाका कारण अछामको रामारोशन गाउँपालिका–५ कैलाशखोलाको बाढीमा परेर ६ जनाको मृत्यु भएको छ । प्रहरीका अनुसार रामारोशन गाउँपालिका वडा–५ सैनिबजारबाट वेपत्ता भएका मध्ये ६ जनाको शव फेला परेको हो । हराएका मध्य ४ जनाको शव बान्नीगढी जयगढ गाउँपालिका–६ दर्नामा पर्ने कोसेडा क्षेत्रमा भेटिएको र दुई जनाको शव मंगलसेन नगरपालिका– ३ स्थित लमतणा र सेरीमा भेटिएको अछामका प्रमुख जिल्ला अधिकारी गोकर्ण प्रसाद उपाध्यायले बताए ।

 यसै गरी मंगलबार रातीदेखी आएको भारी बर्षा संगै आएको पहिरोमा परेर बझाङमा पनि २ जनाको मत्यु भएको छ ।

बझाङका प्रमुख जिल्ला अधिकारी कमल भण्डारीका अनुसार जिल्लाको बुङगल नगरपालीका–५ मिडीमा गयराती गएको पहिरोमा परी चार जना घाईते भएका छन् भने वेपत्ता भएका २ जनाको शव फेला परेको छ । मृत्यु हुनेमा बुङ्गल नपा–५ का १४ बर्षे सचिन ताम्राकार र बुङ्गल–४ का दमन ओखेडा रहेको प्रजिअ भण्डारीले बताए ।

 यसै गरी बाजुरामा पहिरोमा पुिरएर दुई जनाको मृत्यु भएको बाजुरा प्रहरीले जनाएको छ ।

 जिल्ला प्रहरी कार्यालय बाजुराका प्रमुख प्रहरी नायव उपरीक्षक टङ्क राज भट्टराईउनका अनुसार बाजुराको खप्तड छेडेदह गाउँपालिका–१ का मीन बहादुर बुढाकी ३ वर्षीय छोरी सुमीका बुढाको पहिरोमा पुरिएर मृत्यु भएको हो । उनकी ५ बर्षिया दिदी विनीता बुढा र ६५ बर्षिया हजुरआमा नन्दादेवी बुढा पनि घाइते भएको जिल्ला प्रहरी कार्यालय बाजुराले जनाएको छ ।

 त्यस्तै बाजुरामै बढीगाढ र धूपे खोलामा आएको बाढीमा बगेर अर्की एक महिलाको मृत्यु भएको प्रहरी नायव उपरीक्षक भट्टराईले बताए । उनका अनुसार बाजुराको बुढीनन्दा गाउँपालिका– ६ की ७५ बर्षिया धिनु लुहारको पहिरोमा परी मृत्यु भएको छ ।