सुदूरपश्चिम प्रदेशमा झण्डै ७० हजारको स्वाव परिक्षण

धनगढी

   सुदूरपश्चिम प्रदेशमा झण्डै ७० हजारको स्वाव परिक्षण गरिएको छ ।  सामाजिक विकास मन्त्रालयका अनुसार बुधबार सम्म ७० हजार ७ सय ४५ जनाको स्वाव संकलन गरिएकोमा ६९ हजार ४ सय ८२ जनाको स्वाव परिक्षण गरिएको छ ।

 ति मध्य ६ हजार १ सय ४५ जनामा कोरोना संक्रमण पुष्टि भएको मन्त्रालयले जनाएको छ । मन्त्रालयका अनुसार १२ सय ६३ जनाको स्वाव अझै परिक्षण हुन वाँकी छ । प्रदेशको सामाजिक विकास मन्त्रालयका स्वास्थ्य महाशाखा प्रमुख नरेन्द्र कार्कीले बुधवार मात्र अछामका ४५ जना, बझाङबाट २२, डडेल्धुराका ६ जना, कैलालीका तीन जना, डोटीका तीन जना र कञ्चनपुरबाट दुई जनालाई डिस्चार्ज गरिएको जानकारी दिए ।

  यो संगै प्रदेशमा पाँच हजार तीन सय ९३ जना संक्रमण मुक्त भएर घर फर्केका छन् । प्रदेश स्वास्थ्य निर्देशनालय डोटीका अनुसार अहिलेसम्म सबैभन्दा धेरै संक्रमित रहेको कैलालीका एक हजार चार सय ४५ जना निको भएर घर फर्किएका छन् ।

  यस्तै डोटीका नौँ सय सात, अछामका आँठ सय ९३, कञ्चनपुरका ६ सय ६५ जना संक्रमित निको भएर घर फर्किएको दावी स्वास्थ्य निर्देशनालयले गरेको छ । बाजुराका चार सय ४२ जना, बझाङका तीन सय ६४, बैतडीका तीन सय २५, डडेल्धुराका तीन सय सात र दार्चुलाका ४५ जना संक्रमित पनि डिस्चार्ज भएका छन् ।

वाँकी रहेका संक्रमित मध्य ६२ जना प्रदेशका बिभिन्न अस्पतालको आईशोलेसनमा उपचाररत रहेका छन् ।