प्रहरी हिरासतमा युवकको मृत्युबारे छानविन समिति गठन

धनगढी

 प्रहरी हिरासतमा मृत्यू भएका भनिएका वुवकलाई हत्या गरिएको भन्दै आफन्तले चर्को विरोध गरेपछि घटनाको छानविन गर्न समिति गठन गरिएको छ । घटनाको छानबिन गर्न प्रहरी उपरीक्षकको नेतृत्वमा छानबिन समिति गठन गरिएको हो ।

 घटना छानबिन गर्न सशस्त्र प्रहरी गण धनगढीका प्रहरी उपरीक्षक राजीव बस्नेतको नेतृत्वमा छानबिन समिति गठन गरिएको सुदूरपश्चिम प्रदेश प्रहरी कार्यालयका बरिष्ठ प्रहरी उपरीक्षक मुकेश कुमार सिंहले जानकारी दिए ।

 उनका अनुसार समितिमा २ जना प्रहरी निरीक्षकहरू पनि रहेका छन् । केहि दिन भित्रै समितिले प्रतिवेदन तयार गर्ने र त्यो अनुसार कारबाही प्रक्रिया अघि बढाउने उनले जानकारी दिए ।

 भदौ २२ गते चोरी आरोपमा पक्राउ परेका १९ बर्षे रोशन बिक शुक्रबार बिहान मृत अवस्थामा फेला परेका थिए । शुक्रबार ती युवकको मृत्यू भएकोमा प्रहरीले शौचालय गएका बेला झुन्डिएर आत्महत्या गरेको दावी गरेपनि आफन्तले भने प्रहरीको सो खबर झट भएको भन्दै हत्या गरिएको आरोप लगाएका थिए ।