झण्डै २० बर्ष पछि धनगढी बाजुरा हवाई सेवा सुरु

धनगढी

  झण्डै २० बर्ष अघि रोकिएको धनगढी बाजुरा हवाई सेवा पुन सुरु भएको छ । द्धन्दकाल सुरु भएयता रोकिएको हवाई सेवा पुन सुरु भएको हो ।

  शुक्रबार देखि साप्ताहिक उडान भर्नेगरी समिट एयरले सुदूरपश्चिम प्रदेशको राजधानी धनगढी देखि बाजुराको कोल्टी बिमानस्थलका लागि उडान भर्न शुरु गरेको छ । समिट एयरले शुक्रबार  बाजुराको कोल्टी देखि धनगढी र धनगढी देखि कोल्टीका लागि उडान भरेको नागरिक उड्यन कार्यालय बाजुराका निमित्त प्रमुख खुमप्रसाद पौडेलले बताए ।

  २० बर्ष अघि बाजुराको कोल्टी देखि सुदुरपश्चिम प्रदेशको राजधानी धनगढीसँग सिधा हवाई सेवामा जोडिएको र द्वन्द्वको समयमा विमानस्थलमा आक्रमण भए पछि धनगढीसँगको हवाई सम्पर्क अबरुद्ध भएको थियो । बाजुरा नेपालगंंजसँग हवाई सेवामा जोडिए पनि प्रदेश राजधानीसँग भने जोडिएको थिएन । हवाई सेवामा बाजुरा धनगढीसँग जोडिए पछि स्थानीयले खुसी ब्यक्त गरेका छन ।

  नागरिक सेवा सरकोकार मञ्च बाजुराका संयोजक जनेश भण्डारीले विगतका बर्षदेखिनै बाजुरा प्रदेश राजधानी धनगढी संग हवाई सम्पर्कमा जोडिनु पर्ने माग नागरिक स्तरमा बढेको र अहिले सो सेवाको शुरुवात भएकोमा खुसी लागेको बताए । बाजुरा धनगढी संग हवाई सेवामा जोडिएकाले यहाँका नागरिकलाई प्रदेश राजधानी जान आउन सहज हुने अपेक्षा गरिएको छ । पहिले कच्ची रहेको कोल्टी बिमानस्थ लगत बर्ष मात्रै कालोपत्रे भएको थियो ।