गृहमन्त्री थापा गुल्म शिलन्यास गर्न दार्चुलाको छाङरुमा

धनगढी

   गृहमन्त्री रामबहादुर थापा सशस्त्र प्रहरी गुल्मको शिलन्यासका लागि शुक्रबार दार्चुलाको छाङरु पुगेका छन् । उनी दार्चुलाको छाङरुमा निर्माण भइरहेको सशस्त्र प्रहरीको गुल्म भवन शिलन्यास गर्न शुक्रबार दार्चुलाको व्यास गाउँपालिकामा पर्ने छाङरु पुगेका हुन् ।

   थापा काठमाण्डौबाट नेपाली सेनाको स्काइ ट्रकमा सुर्खेत हुदै त्यहाँबाट सेनाकै हेलिकप्टरमा दार्चुला पुगेका छन् । दार्चुलाको छाङरुमा सशस्त्र प्रहरीको गुल्म स्थापना भएसँगै बहुउद्देश्यिय भवन निर्माण गर्न लागिएको छ ।

गृहमन्त्री थापाले गुल्मको शिल्यानसँगै सो क्षेत्रको अनुगमन समेत गर्ने छन् । उनी सँगै गृह सचिव महेश्वर न्यौपाने, सशस्त्र प्रहरी बलका आइजीपि शैलेन्द्र खनाल लगायत ११ जना रहेका छन् ।

 गत असार २९ गते बसेको मन्त्रिपरिषद बैठकले सदरमुकाम खलंगामा रहेको सशस्त्र प्रहरी बल नेपाल नम्बर ५० गुल्म हेडक्वार्टरलाई व्यास गाउँपालिका १ छाङरु स्थित गागामा सार्ने निर्णय गरेको हो । डिएसपिको कमाण्डमा रहेको गुल्ममा एकसय ६० जनाको टोली परिचालन गरिएको छ ।

  सरकारले पहिलोपटक छाङरुमा वैशाख अन्तिम साता बीओपी स्थापना गरेको थियो । इन्स्पेक्टरको कमाण्डमा २५ जना रहँदै आएकोमा अहिले छाङरुमा गुल्म स्थापना भएपछि डीएसपी धीरेन्द्र शाहको नेतृत्वमा टोली खटिएको छ ।