दशै आउन झण्डै आधा महिना मात्र बाँकी रहँदा पनि बाजुरा सडक खुलेन

धनगढी

    बाजुरा सदरमुकाम जोडने साँफे–मार्तडी सडक तिन महिना देखि अबरोध रहेको छ । दशै शुरु हुन अब झण्डै १७ दिन वाँकी रहदा सम्म पनि सडक खुल्ने कुनै सुरसार देखिदैन ।

  सडकका बिभिन्न ठाँउमा गएका पहिरो र पुल बगाएपछि असार देखी अबरोध बनेको साँफे मार्तडी सडक अहिले पनि बन्द नै रहेको छ ।  बर्षा रोकिए सँगै सडक बिभागले सडक खुलाउन प्रयास गरेको भएपनि अझै खुल्न सकेको छैन् ।

  सडक सञ्चालनमा नहुँदा यातायातका साधन तथा स्थानीयलाई समेत आवतजावत गर्न समस्या भएको छ । सदरमुकाम मार्तडी लगायत उत्तरी क्षेत्रमा चरम खाद्य संकट भएको छ । दैनिक उपभोग्य सामानको मुल्य पनि आकाशिएको छ । दुई बर्ष देखी साँफे मार्तडी सड्क अबरुद्ध हुदै आएको थियो ।

 सडक खण्डको बुढिगंगा नगरपालिका १ बल्दे देखी द्धारी सम्म डोजरले सडक खोल्दै गरेपनि पछाडीबाट भत्किरहेको छ । सडक बिभागले सडक खुलाउनका लागि दुईतिन ठाँउ बाट डोजर लगाएको भएपनि अगाडि काम गर्दै पछाडी भत्कदै आएको सडक बिभागका ईन्जिनियर दमन बिष्टले वताए ।

  ‘एक चरणमा सामान्य ट्रयाक खोलेका थियौ, फेरि पहिरो आएर सडक भत्किरहेको छ’ ईन्जिनियर बिष्टले भने– ‘तीन ठाँउमा दलदल जमिन रहेकाले माथिबाट पहिरो आइरहेको छ, सडक खुलाउन निकै समस्या भएको छ ।’ अझै पनि प्रयास जारी रहेको उनले बताए । असार महिना देखिको लगातारको बर्षा सँगै बाढि पहिरोले साँफे मार्तडी सडक खण्डको बार्जुगाड देखी मार्तडी सम्म ठाँउ ठाँउमा पहिरोले सडक अबरोध भएको छ । बाढीले बुढिगंगामा बेलिब्रिज र ताप्रिसेरामा पुल बगाएको छ ।

 ‘पहिराले बुढिगंगा नगरपालिका १ अम्कोटमा सडक नै तहसनहस हुने गरी बिगारेको छ’ बाजुराका प्रमुख जिल्ला अधिकारी कृष्ण गैरेले भने– ‘अन्य ठाँउमा सडक खुलाएको भएपनि बुढिगंगाको बल्दे देखी द्धवारी सम्म करिब २ किलोमिटर सडक खोल्न निकै समस्या भएको छ ।’ सडक खुलाउन सबै तिर पहल भइरहेकोले दशै सम्म खुलाउन सकिन्छकी भनेर लागिरहेको उनले बताए । प्रजिअ गैरेले बुढिगंगा नदिमा बेलिब्रिजको लागि पनि पहल भइरहेको जानकारी दिए ।

बिगत बर्ष बर्षातको समयमा त्यही ठाँउमा पटक पटक सडक अबरोध हुदै आएको थियो । हिउँदमा त सडक भासिएको छ, बर्षात यो सडक बन्द नै हुने अबस्थामा पुगेको छ ।