लकडाउन हुने भन्दै व्यवसायी चिन्तित, ‘बन्द गरे प्रतिकार गछौं: कुँवर

धनगढी पोष्ट

बिहिबार, १५ असोज २०७७ मा प्रकाशित

धनगढी

हिन्दुहरुको प्रमुख चाड दशै नजिकिदै गर्दा विगतमा कैलालीको धनगढी बजार सुदूरपश्चिममै सवै भन्दा बढी व्यवस्त हुने बजार हो ।

अन्य बर्ष यतिवेला काठमाण्डौंबाट धनगढी सामाग्री आउँदा धनगढीबाट सुदूरपश्चिमका पहाडी जिल्लामा दशै लक्षित सामाग्री ढुवानी हुने एक प्रकारको चक्र नै सुरु हुने गर्दथ्यो । जसका कारण धनगढी बजारमा मानिसको थामि नसक्नु भिड लाग्ने गर्दथ्यो । तर यस बर्ष भने परिस्थित फरक भएको छ ।

दशै सुरु हुन १५ दिन मात्रै बाँकी रहँदा धनगढीका व्यवसायी यस बर्ष भने अन्यौलमा छन् । देशमा कोरोना संक्रमितको संख्या बढ्दै जाँदा पुनः लकडाउन हुन्छकी भन्ने आशंकाले व्यवसायी दशैका लागि सामाग्री खरिद गर्ने की नगर्ने भन्ने दुविधामा छन् ।

लकडाउनकै विच तिजमा धेरै व्यवसायीले सामाग्री खरिद गर्दा कोरोवार भएन । जसका कारण तिज लक्षित सामाग्री गोदाममा थन्काउनु परेको व्यवसायीको तितो अनुभव छ । दशैमा पनि तिज जस्तै हालत भए खरिद गरिएको सामाग्री चिसो याममा नविक्ने र त्यसले ठुलो व्यापार घाटा हुने भन्दै कैलालीका व्यवसायी दशै लक्षित सामाग्री खरिद गर्ने वा नगर्ने भन्ने दुविधाले छटपटाउन थालेका व्यवसायी जगदिश जोशीले बताए ।

‘हाम्रो व्यापार मुख्य गरी सुदूरपश्चिमका पहाडी क्षेत्रमा हुन्छ’ जोशीले भने–‘तर अहिले सम्म पहाडी क्षेत्रका व्यवसायी तराई झरेका छैनन्, यस्तोमा कसरी हामीले काठमाण्डौंबाट सामाग्री मगाउने ।’

दशैका लागि ल्याइएको सामाग्री सोही समयमा बिक्रि नभए ती सामाग्री अर्को बर्ष सम्म गोदाममा थन्काउनु पर्ने र त्यसले लगानी डुब्न सक्ने उनले बताए ।

‘असोज १ गते देखी बजार खुलेपनि ग्राहक अझै आएका छैनन्’ धनगढी बसपार्कका व्यवसायी राजेन्द्र रम्तेलले भने–‘बजारमा फेरी लकडाउन हुन्छ भन्ने हल्ला छ, यस्तोमा नयाँ सामान थप्ने की नथप्ने भन्ने दुविधा बढेको छ ।’

केही दिन अघि स्वास्थ्य तथा जनसंख्या मन्त्रालयले दिएकोे अभिव्यक्तिका कारण कैलालीका व्यवसायी थप ससंकित भएका देखिन्छ ।

स्वास्थ्य तथा जनसंख्या मन्त्रालयका प्रबक्ता डाक्टर जागेश्वर गौतमले केही दिन अघिको नियमित प्रेस ब्रिफिङ कार्यक्रममा देशमा २५ हजार बढी सक्रिय संक्रमित हुँदा लकडाउन गर्न सरकारलाई सुझाव दिएका थिए ।

उनको सो अभिव्यक्ति पछि व्यवसायी थप ससंकित बनेका धनगढी होलसेल व्यवसायी संघ धनगढीका अध्यक्ष तिलक खतिवडा बताउँछन् । ‘

तिजमा सामान खरिद गरेका धेरै व्यवसायीले व्यापार घाटा खाए’ उनले भने–‘दशैमा पनि फेरी सरकारले लकडाउन गर्छकी भन्ने डर र आसंङ्का व्यवसायीमा छ, त्यसैले सामान खरिद गर्न उनिहरु अलमलमा परेका छन् ।’

उनले अव बजार बन्द हुदैन, ढुक्क भएर व्यापार गर्न हरेक दिन व्यवसायीलाई सम्झाउने गरेको बताए । उनले भने–‘हामीले जति सम्झाए पनि व्यवसायी हाम्रो कुरामा पत्याउँदैनन्, सरकारले कति वेला के गर्छ भन्ने आशंकाले पिरोलेको छ ।’

कैलाली उद्योग बाणिज्य संघका अध्यक्ष पुष्पराज कुँवरले भने सरकारले अव पनि लकडाउन गर्ने बारेमा सोच्यो भने त्यसको प्रतिकार गर्ने भन्दै ढुक्क भएर व्यवसायीलाई काम गर्न आग्रह गरे ।

‘सरकारले अव लकडाउनको विकल्प खोज्नै पर्छ’ अध्यक्ष कुँवरले भने–‘अव पनि सरकारले लकडाउन गरिरहे हामी त्यसलाई मान्दैनौं, लकडाउनका विरुद्ध जान बाध्य हुनेछौं ।’