बैतडीमा फस्फोराईडको खानीको अन्वेषण सुरु

धनगढी

 बैतडीमा रासायनिक मल निर्माणका लागि आवश्यक पर्ने प्रमुख कच्चा पदार्थ फस्फोराईडको खानी अध्यन गर्ने कार्य सुरु गएको छ ।

 खानी उत्खनन् अन्तरगत शनिबार उद्योग, वाणिज्य तथा आपूर्तिमन्त्री लेखराज भट्टले फस्फोराईडको ड्रिल निर्माण उद्घाटन गरेका छन् । उद्घाटन गर्दै मन्त्री भट्टले रोजगारीको सिर्जना गर्न सरकारले उद्योग स्थापनामा जोड दिएको बताए ।

 बैतडीको दोगडाकेदार गाउँपालिकामा शनिबार फस्फोराइड अन्वेषणात्मक ड्रिलिङको शुभारम्भ गर्दै उनले खानी तथा खनिज पदार्थको उत्खनन् गरी रोजगारीको सिर्जना गर्न सकिने बताए ।

‘कामका लागि विदेशिने युवालाई स्वदेशमै काम दिनपर्छ भन्ने दृढता सरकारको छ’ मन्त्री भट्टले भने–‘त्यसका लागि खानीको अन्वेषण, कृषि उद्योग जस्ता ठुला क्षत्रको निर्माण र लगानीको वातावरण निर्माण गरिरहेका छौं ।’

 रसायनिक मलका लागि  फस्फोराइड अति आवश्यक पर्ने जनाइएको छ । यसै आवश्यकता पुरा गर्न परीक्षणका लागि उत्खनन् शुरुआत गरिएको हो ।

दोगडाकेदार–७ बसौरामा डोलोमाईड चट्टान पत्ता लागे पछि खानी तथा भूगर्भ विभागले रसायनिक मल बनाउने कारखानाका लागि डोलोमाइड चट्टान उत्खनन गर्ने तयारी गरेको हो ।

 विभागले यही असोज ५ गते प्राविधिकको टोली वैतडी पठाएको थियो । विभागका वरिष्ठ भूगर्भविदद्वय कुमार खड्का र भूसुजन देवकोटा लगायतको विज्ञ तथा प्राविधिकको टोली केही दिन अगाडि वैतडीको दोगडाकेदार पुगेको थियो ।