भारतको देहरादुनमा कुटिएका भनिएका विद्यार्थी कञ्चनपुर भित्रिए, कुटपिट भएको कुनै प्रमाण छैन: प्रहरी

धनगढी

 भारतको देहरादुन स्थित एक आश्रममा कुटपिटमा परेका भनिएका मध्य ५ जना विद्यार्थी कञ्चनपुरको गड्डाचौकि नाका हुँदै महेन्द्रनगर भित्रिएका छन् । उनिहरुले आफुहरुमाथी कुनै कुटपिट नभएको तर छुट्टी नपाएकाले भागेर आएको भन्दै प्रहरीलाई बयान दिएका छन् ।

 जिल्ला प्रहरी कार्यालय कञ्चनपुरका अनुसार कञ्चनपुर भित्रिनेमा ३ जना भारतको बिहाका १५, १७ र १८ बर्षे विद्यार्थी रहेका छन् भने दुई जना नेपाली विद्यार्थी रहेका छन्  । उनिहरु मध्य १ जना बाग्लुङ र अर्को व्यक्ति सिन्धुपाल्चोकका रहेका जिल्ला प्रहरी कार्यालय कञ्चनपुरका प्रबक्ता प्रहरी नायव उपरिक्षक अम्मरबहादुर थापाले बताए ।

 थापाका अनुसार कुटपिट पछि भागेर आएका भनिएका ति विद्यार्थीले आफुमाथी कुनै कुटपिट नभएको तर दशैमा छुट्टी नपाएपछि आफुहरु भागेर आएको भन्दै प्रहरीलाई बयान दिएका छन् ।

  ‘घटना क्रमलाई हेर्दा पनि ती विद्यार्थीमाथी कुनै प्रहारको शारीरिक यातना भए जस्तो देखिदैन’ प्रहरी प्रबक्ता थापाले भने–‘विद्यार्थीले भने जस्तै उनिरुह दशैमा छुट्टी नपाएपछि भागेर आएका हुनसक्दछन् ।’

 प्रमुख जिल्ला अधिकारी रामकुमार महतोले नेपाल भित्रिएका विद्यार्थीलाई कुटपिट भएको कुनै प्रमाण नभेटिएको बताए । उनले घटनाका बारेमा थप अध्यन भइरहेको बताए ।

 कुटपिट पछि नेपाल भित्रिएका भनिएका ५ मध्य तीन जना भारतीय विद्यार्थी भएकाले उनिहरुलाई उतैबाट भारत फर्काइएको र २ जना विद्यार्थीलाई नेपाल भित्र्याएर सम्बन्धित स्थानमा पठाउने तयारी भइरहेको प्रजिअ महतोले बताए ।

 अहिले भारतीय नागरिकलाई नेपाल भित्रन नदिने सरकारी निर्णय अनुसार भारतीय विद्यार्थीलाई गड्डाचौकिबाटै भारत पठाइएको उनले बताए ।

 विजया दशमि मनाउँन छुट्टी मागेर नेपाल आउन चाहने विद्यार्थीलाई भारतको देहरादुन स्थित एक आश्रमका अध्यक्षले नेपाली विद्यार्थीमाथी निर्घात कुटपिट गरेको भन्ने आरोप लाग्दै आएको छ ।