अबैध तरिकाले भारत लगिँदै गरेकी युवतीको कंचनपुरमा उद्वार

गोपाल भट्ट
धनगढी । 

  अबैध रुपमा भारत लगिदै गरिएकी एक युवतीको कंचनपुरबाट उद्धार गरिएको छ । कञ्चनपुरको अवैध नाका भएर भारत लगिँदै गरेकी युवतीको बुधबार सशस्त्र प्रहरीले उद्वार गरेको हो ।

  प्रहरीले ती युवतीलाई भारत लग्न लागेको दुई जना युवकलाई समेत पक्राउ गरेको छ । कंचनपुरको दोधाराचाँदनी नगरपालिका–१ पशुपतीटोल स्थित अवैध नाकाबाट भारततर्फ लैजान खोजीरहेको अवस्थामा १८ वर्षीया किशोरीको उद्वार गरिएको सशस्त्र प्रहरी बल नेपाल नम्बर ३५ गण हेडक्वाटर शैलेश्वरी कञ्चनपुरले जनाएको छ ।

 बोडर आउट पोष्ट बयलबन्दाबाट सहायक प्रहरी नायव निरीक्षक तेज सिंह भण्डारीको कमाण्डमा खटिएको सीमा गस्ती टोलीले युवती संगै २ जना युवकलाई समेत नियन्त्रणमा लिएको छ ।

  युवतीको साथमा रहेका गोरखाको गण्डकी गाउँपालिका–२ का २८ वर्षीय विकाश चेपाङ्ग र ४० वर्षीय होलबहादुर मगरलाई नियन्त्रणमा लिएको सशस्त्र प्रहरी उपरीक्षक बिरेन्द्र बहादुर ऐरले जानकारी दिए । उनका अनुसार नियन्त्रणमा लिएका तीनै जनालाई शान्ति पुर्नस्थापना गृह दोधाराचाँदनीको जिम्मा लगाइएको छ ।