लैंगिक हिंसा न्युनिकरणबारे अन्तरक्रिया

धनगढी

 अन्तराष्ट्रिय महिला दिवसको पुर्ब सन्ध्यामा लैंगिक हिंसा न्युनिकरणमा सरोकारवालाहरुको भूमिका बिषयमा  अन्तरक्रिया सम्पन्न भएको छ ।

आईतबार संवाद समुह धनगढीको  आयोजनामा  गरिएको अन्तरक्रिया कार्यक्रममा सहभागि बक्ताहरुले महिलाका कारण महिला नै हिंसामा पर्ने गरेको बताए । उनीहरुले हरेकको  घरमा हिंसाका घटना भईरहेका जसमा महिलाको नै सहभागिता रहने गरेको बताए ।

 ‘महिलाले महिला माथि बढी हिंसा गर्ने गरेका छन्’ महिला वडा सदस्य खगेश्वरी जोशीले भनिन–‘पढेलेखेकी महिला नै अर्को महिला माथि सौता बन्न जान्छन, योभन्दा ठुलो हिंसा के  होला  ?’ उनले  भनिन् –‘पुरुषले  मात्र महिले हिंसा नगरी महिलाले  पनि पुरुष हिंसा गरिरहेका छन ।’  श्रीमान बिदेशमा दुख गरेर पैसा कमाउने यता श्रीमती बिदेशबाट पठाएको पैसा समेत लगेर अर्कै केटा संग हिडने गरेका  वडा सदस्य जोशीले बताईन ।

 यस्तैअर्का वडा सदस्य यमुना जोशीले महिलाका नाममा कानुन बन्ने तर कार्यान्वयन नहुँदा हिंसा बढेको बताईन । उनले हरेक ठाउँमा  महिला हिंसा भईरहेको  बताउँदै घरबाट निष्केदेखि घरपुग्दा सम्म बिभिन्न खालका हिंसा भईरहेको उल्लेख गरिन । अनेमसंघकी जिल्ला सदस्य लक्ष्मी  रिजालले धेरै महिलालाई आफ्ना अधिकारका बारेमा  समेत जानकारी नभएको बताईन । उनले भनिन्–‘महिलाले पनि हिंसाबाट  बच्न उपायको  खोजिगर्नु पर्छ, यसमा पुरुषले  सहयोग गर्नुपर्छ  ।’

   याक नेपालका सर्जु चौधरीले नीतिको बुझाईमा समस्याले पनि कार्यान्वयनमा कठिनाई  भईरहेको बताए  । उनले  लैंगिक हिंसा न्युनिकरणका लागि सबैले आ –आफ्नै घरबाट सुरु गर्नुपर्ने बताए ।

संबिधान सभा सदस्य हरी श्रीपाईलीले अधिकारका क्षेत्रमा धेरै परिबर्तन भएपनि   पढेलेखेकै मान्छेबाट हिंसा भईरहेको  बताए । उनले मानसिक  चेतनामा अझै कमी रहेको उल्लेख गरे । यस्तै  प्रदेश सभा सदस्य चुनकुमारी चौधरीले महिला सक्षम हुन तथा हिंसामा कमी ल्याउन  घर–घरबाट सहयोग हुनुपर्ने बताईन । उनले महिलाले चाहेर मात्र हिंसा न्युनिकरण नहुने त्यसका लागि पुरुषको सहयोग आवश्यक रहेको उल्लेख गरिन्  ।

 संवाद समुहका सदस्य प्रभात चौधरीले महिला पुरुष सबैले आ आफ्नो अधिकार र कर्तब्यका बारेमा सचेत भएपछि मात्र लैगिक हिंसामा कमी हुने बताए । संवाद समुहकी सदस्य सरु चौधरीको अध्यक्षतामा सम्पन्न अन्तरक्रियामा कर्ण शाहले सहजिकरण गरेका थिए ।