एक साता पछी सुदूरपश्चिम भित्रियो मनसुन

धनगढी

    एक साता अघि नेपाल प्रवेस गरेको मनसुन एक साता पछी मात्रै सुदूरपशिचम प्रदेशमा  प्रवेस गरेको छ । जल तथा मौसम पूर्वानुमान महाशाखाका अनुसार देशभर मनसुन फैलिए पनि वर्षा भने पूर्वी र मध्य भागमा केन्द्रित छ ।

    नेपालमा यस बर्ष औषत भन्दा दुई दिन ढिलो गरी मनसुन भित्रिएको थियो । महाशाखाका वरिष्ठ मौसमविद् राजु प्रधानाङ्गका अनुसार यो गत वर्षभन्दा छिटो हो । सामान्यता नेपालमा १० जुनमा मनसुन प्रवेश हुने गर्दछ । गत वर्ष औसत समय भन्दा १० दिन ढिलो गरी २० जुनमा मनसुन सुरु भएको थियो ।

     यो वर्ष औसत समय आसपासमै मनसुन सुरु भई करिब एक साताभित्र देशैभर सक्रिय भएको छ । पूर्वका केही स्थानमा भारी वर्षासँगै पहिरो र बाढीको जोखिम समेत बढेको छ । छिटो मनसुन प्रवेश भएकाले कोरोनाबाट आक्रान्त बनेका किसानलाई भने राहत मिलेको छ । वर्षासँगै मुलुकका धेरैजसो भागमा किसान रोपाइँमा व्यस्त भएका छन् ।

विगतमा मनसुन प्रवेश भए पनि लामो समय निस्कृय हुँदा किसानले धान रोप्न नपाउने गरेको भएपनि यस बर्ष छिट्टै सक्रिय हुँदा किसानलाई भने निक्कै राहत भएको छ । मौसमविद प्रधानाङ्गले ६ दिनमै मनसुन सक्रिय हुनु राम्रो भएको बताए ।

     महाशाखाका अनुसार शुक्रबार (आज) दिउँसो प्रदेश १, प्रदेश २, वाग्मती प्रदेश, गण्डकी प्रदेश र प्रदेश नं ५ का धेरै स्थानहरुका साथै कर्णाली र सुदूरपश्चिम प्रदेशका थोरै स्थानहरुमा हल्कादेखि मध्यम वर्षाको सम्भावना रहेको छ ।

    शनिबार पनि प्रदेश १, प्रदेश २, वाग्मती प्रदेश, गण्डकी प्रदेश र प्रदेश नं ५ का धेरै स्थानहरुमा साथै कर्णाली र सुदूरपश्चिम प्रदेशका केही स्थानहरुमा वर्षाको संभावना रहेको महाशाखाले उल्लेख गरेको छ ।