बैतडीमा जीप दुर्घटनामा छ जनाको मृत्यु

बैतडी

 बैतडीमा चट्याङ लागेर मृत्यु भएकालाई जिल्ला सदरमुकाम लैजाने क्रममा मंगलबार भएको जीप दुर्घटनामा छ जनाको मृत्यु भएको छ । पञ्चेश्वर गाउँपालिका–६ रोडिदेवलको गणमेश्वर मन्दिर नजिकै भएको जीप दुर्घटनामा ४ जनाको घटनास्थलमै र  २ जनाको अस्पताल लैजाने क्रममा मृत्यु भएको हो ।

 दुर्घटनामा पञ्चेश्वर गाउँपालिकाको वडा नम्बर ६ का ५० वर्षीय जीतसिंह भण्डारी, ३० वर्षीय डम्मरसिंह भण्डारी, २७ वर्षीय हिम्मत भण्डारी र ४० वर्षीय दीपक भण्डारीको घटनास्थलमै मृत्यु भएको जिल्ला प्रहरी कार्यालय बैतडीका प्रवक्ता प्रहरी निरीक्षक दर्शन खड्काले बताए । प्रहरी निरीक्षक दर्शन खड्काका अनुसार दुर्घटना घाइते भएका चालक तेज बहादुर बोहरा र ५० वर्षीय खेमसिंह भण्डारीको उपचारका लागि लैजाने क्रममा बाटोमै मृत्यु भएको हो  ।

  दुर्घटनामा घाइते भएका अन्य ४ जनालाई उपचारका लागि जिल्ला अस्पताल लगिएको छ । घाइते हुनेमा सोही ठाउँका ३५ वर्षीय मोहनसिंह भण्डारी, ३० वर्षीय हरिसिंह भण्डारी, २८ वर्षीय मदनसिंह भण्डारी र २४ वर्षीय दिलिपसिंह भण्डारी रहेका छन्।

    सोमबार चट्याङ लागेर मृत्यु भएका पञ्चेश्वर गाउँपालिका–६ का वडा सदस्य गोविन्दसिंह भण्डारीको शव पोष्टमार्टमका लागि जिल्ला सदरमुकाम लजाने क्रममा से १ ज १२३ नम्बरको जीप दुर्घटनामा परेको हो ।