सुदूरपश्चिममा थप ५ जनामा कोरोना पुष्टि

धनगढी

  सुदूरपश्चिममा थप ५ जनामा कोरोना पुष्टि भएको छ । आज धनगढी स्थित कोरोना परीक्षण प्रयोगशालामा गरिएको परिक्षणबाट थप पाँच जनामा कोरोना पुष्टि भएको सेती प्रादेशीक अस्पतालका सुचना अधिकारी दिलिप श्रेष्ठले जानकारी दिए । 

आज थप पाँच जनामा कोरोना पुष्टि संगै सुदूरपश्चिममा संक्रमितको सङख्या ७८ पुगेको छ । आज पुष्टि भएकामा कैलालीका तीन र डोटीका २ जना रहेको सूचना अधिकारी  श्रेष्ठले जानकारी दिए । उनका अनुसार धनगढी उप–महानगरपालिका वडा नम्वर ५ का ५१ बर्षीय पुरुष, गौरीगंगा नगरपालिकाका २० र २५ बर्षीय पुरुषमा कोरोना पुष्टि भएको हो । यसैगरी डोटीका पूर्वीचौकी ४ का २३ बर्षीय र पूर्वीचौकी ७ का २५ बर्षीय पुरुषमा कोरोना पुष्टि भएको उनले बताए ।

   सुदूरपश्चिमका ७८ जना संक्रमित मध्ये ७६ जना प्रदेश भित्रै रहेका छन् भने एक जना बझाङ र एक जना बाजुराका संक्रमितको भने कर्णाली प्रदेशमा उपचार भईरहेको छ । संक्रमित मध्य एकजनाको मृत्यु भईसकेको छ भने ७ जना प्रदेशभित्रबाटै कोरोना जितेर घर फर्केका छन् ।