छोरीको बलात्कारपछि हत्याको आरोपमा बाबु पक्राउ

धनगढी । आफ्नै छोरीको बलात्कार पछि  हत्या गरेको आरोपमा प्रहरीले कैलालीमा  एक जनालाई पक्राउ गरेको छ ।

लम्कीचुहा नगरपालिका वडा नम्बर  २ की १० वर्षीया बालिकाको बलात्कारपछि हत्या गरेको आरोपमा उनका ५१ वर्षीय बुवालाई प्रहरीले जेठ ३० गते  पक्राउ गरेको हो ।

भैसी गोठमा मृत अवस्थामा भेटिएकी भनिएकी बालिकाको घरपरिवारले दाहसंस्कार गर्ने तयारी गरिरहेको भन्ने सूचनाका आधारमा ईलाका प्रहरी कार्यालय लम्कीबाट खटिएको प्रहरी टोलीले घटनास्थल र शव जाँच लगायतको कार्य पुरा गरी शव पोष्टमार्टम तथा यौनजन्य परिक्षणका लागि सेती प्रादेशिक अस्पतालमा पठाएपछि बलात्कारपछि हत्याको पुष्टि भएको  जिल्ला प्रहरी कार्यालय कैलालीले जनाएको छ ।

बुवाले जेठ २७ गते भैँसी गोठमा लगी जवरजस्ती करणी गरेर भैँसी गोठमा नै झुण्डाई हत्या गरेको प्रहरीले जनाएको छ । बलात्कारको घटना लुकाउन आत्महत्या गरेको जस्तो देखाउन खोजिएको प्रहरीले जनाएको छ ।

ती बुवालाई ज्यान सम्वन्धी कसुर (कर्तव्य ज्यान) शीर्षकमा कैलाली जिल्ला अदालतमा मुद्धा दर्ता गरि म्याद थप गरिसकिएको छ ।