कर्णाली नदीको पुल भासियो

धनगढी  । कैलालीको टीकापुर नगरपालिकाको सत्ती बजार नजीकै रहेको कर्णाली नदीको पुल भासिएको छ ।  पुल भासिएपछि हुलाकी राजमार्गबाट हुने कैलाली र बर्दियाबीचको आवतजावत बन्द भएको छ ।

यो पुल निर्माण भएपछि कैलाली र बर्दिया जिल्लाको दक्षिणी क्षेत्रमा यातायात सेवा सञ्चालन भएको थियो । विभिन्न यातायात समितिले बस सेवा सुरु गरेका थिए भने साना सवारीका साधन समेत सञ्चालनमा आएका थिए ।

चिसापानी पछि कैलाली कन्चनपुरका बीचमा आवतजावत हुने दोश्रो पुल हो । प्रहरी कार्यालय सत्तीका इञ्चार्ज प्रहरी नायब निरिक्षक लोकेन्द्र चन्दका अनुसार पुलको पुर्वतर्फको भाग भासिएको छ । उनका अनुसार नदीले पुर्व तर्फको भाग काट्न थालेको छ । उनले पुलमा आवागमन बन्द गरिएको बताए ।

हुलाकी राजमार्ग अन्तर्गत निर्माण भएको लगत्तैदेखि पुलको पुर्वतर्फको भागमा नदीले हरेक वर्ष कटान गर्दै आएको थियो ।