चितुवाको छाला र बाघको हड्डी सहित बाजुरामा ३ जना पक्राउ

बाजुरा

  चितुवाका दुई थान छाला र बाघको २ किलो हड्डी सहित बाजुरा जिल्लामा प्रहरीले तीन जनालाई पक्राउ गरेको छ ।

   बाजुराको त्रिवेणी नगरपालिका–६ पन्धाराबाट मंगलबार राति उनीहरुलाई  पक्राउ गरिएको जिल्ला प्रहरी कार्यालय बाजुराले जनाएको  छ । त्रिबेणी नगरपालिकाकै  वडा नम्बर ५, ६ र ७  का ३ जनालाई प्रहरीले पक्राउ गरेको हो । उनीहरुलाई जिल्ला प्रहरी कार्यालयमा लगिएको छ ।

बन्यजन्तुकै तस्करीको बारेमा थप अनुसन्धान गरेर  जिल्ला बन कार्यालयलाई  बुझाइने जिल्ला प्रहरी कार्यालय बाजुराका प्रमुख प्रहरी नायब उपरिक्षक  टंक भट्टराईले बताए ।  छाला तस्करी गर्ने तीनै जनालाई चोरी सिकारी तथा पैठारी सम्बन्धीको ऐन अनुसार कानुनी कारबाही गरिनेछ ।