कैलालीमा संचालन भएको सैपाल ग्याँसको बिक्रि वितरण शुरु

धनगढी

          कैलालीको गोदावरी १ मा स्थापना गरिएको सैपाल ग्याँस उद्योगको उत्पादन आजदेखि बजारमा गएको छ ।

       एभरेस्ट ग्रुपले सैपाल ग्यास उद्योग मार्फत उत्पादित ग्याँस आजबाट बजारमा पठाएको छ । कैलाली र कञ्चनपुरका ४० वटा डिलर मार्फत ग्यास बजारमा पठाएको सैपाल ग्याँस प्रालिका प्रस्तावित अध्यक्ष शिवप्रसाद घिमिरेले जानकारी दिए ।

     काठमाडौं उपत्यकामा समेत गरि ६ वटा ग्याँस उद्योग रहेको एभरेष्ट ग्रुपले सैपाल ग्याँसका लागि आयल निगमबाट करिब तीन महिनाअघि मात्रै सञ्चालन स्वीकृति पाएको अधयक्ष घिमिरेले जानकारी दिए । यो संगै एभरेष्ट गु्रपसंग ग्याँस उद्योगको संख्या ७ पुगेको छ ।

    करिव ३० करोड लगानीमा ४३ कट्टा जग्गामा कैलालीको गोदावरी नगरपालिका –१ मा उद्योग संचालन गरेको सैपाल ग्याँसले प्रत्येक दिन १० हजार सिलिण्डर उत्पादन गर्न सक्ने संचालक घिमिरेले जानकारी  दिए ।

    नेपाल एलपी ग्यास उद्योग संघका पूर्व अध्यक्ष समेत रहेका सैपाल ग्यासका सञ्चालक घिमिरेले सैपाल ग्यासको उत्पादन सुदूरपश्चिम संगै कर्णाली र प्रदेश नम्वर ५ का बजारमा पनि पठाईने बताए ।

  उनले भने–‘न्युन मात्रामा उद्योगहरु रहेको सुदूरपश्चिममा सेवामुखि भावनाले हामीले उद्योग संचालन गरेका छौं, सबैको सहयोगले यसलाई थप बिस्तार गर्दै जाने  छौं ।’ उनले यस पटक पहिलो बर्ष भएकोले बार्षिक ५६ करोडको कारोबार हुने अनुमान रहेको बताउँदै आगामी बर्षबाट थप बृद्धि हुदै जाने उल्लेख गरे ।

      करिब ३१ बर्षदेखि पेट्रोलियम कारोबार गर्दै आएको एभरेष्ट गु्रपले केहीदिन अघि मात्रै उद्योग वाणिज्य तथा आपूर्तिमन्त्री लेखराज भट्टकी श्रीमती निर्मलादेबी भट्ट लगायत ५ जनाको स्वामित्वमा रहेको उक्त ग्यास उद्योग १८ करोडमा किनेको थियो । 

  सुदूरपश्चिममा यो संगै ग्याँस उद्योग  दुईवटा भएका  छन् । केही बर्ष अघि देखि रेडियन्ट ग्याँस उद्योग पनि कैलालीको गोदावरी नगरपालिकाको मालाखेतीमै संचालनमा रहेको छ ।