किसान सहकारीको रसुवा बाढी पीडितका लागि  ७ लाख ५१ हजार सहयोग

​रसुवा जिल्लामा भोटेकोशी नदीमा आएको भीषण बाढी तथा प्राकृतिक विपत्तिबाट प्रभावित नागरिकहरूको खोज, उद्धार, तत्काल राहत एवं दीर्घकालीन पुनर्स्थापनाका लागि कैलालीको लम्कीचुहास्थित किसान बहुउद्देश्यीय सहकारी संस्था लिमिटेडले रु. ७ लाख ५१ हजार (सात लाख एकाउन्न हजार) आर्थिक सहयोग गरेको छ।

​संस्थाका सञ्चालक, कर्मचारीहरू तथा संस्थाको तर्फबाट संकलित उक्त सहयोग रकम ‘प्रधानमन्त्री दैवी प्रकोप उद्धार कोष’ को नाममा चेक मार्फत जम्मा गरिएको संस्थाका अध्यक्ष सुरेन्द्र कुमार शाह र महाप्रबन्धक डम्बर बहादुर शाहद्वारा जारी अपिल नोट मार्फत जानकारी गराइएको छ ।

​उक्त अपिलमा मिति २०८३ भदौ १० गते आएको विनाशकारी विपत्तिमा ज्यान गुमाएका नागरिकहरूप्रति हार्दिक श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना व्यक्त गरिएको छ । साथै, विपद्मा बेपत्ता भएका आफ्ना प्रियजनको खोजी तथा खबरको प्रतीक्षामा रहेका परिवारजनको पीडा, चिन्ता र दुःखप्रति किसान सहकारी परिवारले गहिरो ऐक्यबद्धता प्रकट गरेको छ ।

​विषम राष्ट्रिय परिस्थिति र संकटको यस घडीमा प्रभावित नागरिकहरूको उद्धार, राहत तथा पुनर्स्थापना कार्यमा थप सहयोग पुर्‍याउन संस्थाले सबैमा आह्वान समेत गरेको छ । अपिल नोट मार्फत आफ्नो क्षमता र इच्छानुसार ‘प्रधानमन्त्री दैवी प्रकोप उद्धार कोष’ मा आर्थिक सहयोग उपलब्ध गराई मानवीय सेवामा हातेमालो गर्न सम्पूर्णमा हार्दिक अनुरोध गरिएको छ ।