ससुरा  र  बुहारीले जिते प्रतिनिधि सभा सदस्य निर्वाचित

धनगढी । बर्दियाको निर्वाचन क्षेत्र नम्बर २ बाट  लालबीर चौधरी प्रतिनिधि सभा सदस्य निर्वाचित भएका छन् । बर्दियाबाट निर्वाचित भए पनि लालबीरको घर कैलालीको टीकापुर हो ।

कैलालीको निर्वाचन क्षेत्र नम्बर १ बाट रन्जिता श्रेष्ठ चौधरी प्रतिनिधि सभा सदस्य निर्वाचित भएकी छन् । रन्जिताको घर पनि टीकापुर नै हो ।

प्रतिनिधि सभा सदस्यमा निर्वाचित लालबीर र रन्जिताको घर मात्र एकै ठाउँ होइन । उनीहरुको घर पनि एकै हो । अर्थात लालबीर र रन्जिता ससुरा बुहारी हुन् ।

अर्को शब्दमा लालबीर २०७४ मा भुमिगत रुपमा नै चुनाव लडेर प्रतिनिधि सभा सदस्यमा भारी मतले बिजयी भएका रेशम चौधरीका बुवा हुन् भने रन्जिता श्रीमती ।

पहिचानको मुद्धा स्थापित गर्न र टीकापुर घटनालाई राजनैतिक मुद्धाका रुपमा लिएर स्थापित गर्न स्थापना भएको नागरिक उन्मुक्ति पार्टीबाट उनीहरु प्रतिनिधि सभा सदस्य निर्वाचित भएका हुन् ।

२०७४ मा भारी मतान्तरले प्रतिनिधि सभा सदस्य निर्वाचित भए पनि  रेशमले जेलमा नै रहेर सपथ पनि लिन नपाएपछि यसपटक कैलाली १ बाट रन्जिता चुनाव लडेकी हुन् । रन्जिताले निकटतम प्रतिस्पर्धी कांग्रेसका रामजनम चौधरीलाई  ठुलो अन्तरले पराजित गरेकी छन् ।

 चुनाव यसपटक लडे पनि रन्जिताले गत पुसमार नागरि उन्मुक्ति पार्टीको सथापना गरेर गत बैशाखमा भएको पालिकाको निर्वाचनमा  पार्टीको सहभागिता गराएकी थिइन् । उक्त चुनावमा नागरिक उन्मुक्तिले कैलालीको पुर्वी क्षेत्रका टीकापुर नगरपालिका, जानकी गाउपालिका, भजनी नगरपालिका र जोशीपुर गाउपालिकामा बहुसंख्यक सिटमा जित हासिल गरेको थियो ।

 रन्जिताले २०७४  भुमिगत  रहेका आफ्ना श्रीमान रेशमलाई बिजयी बनाउन गाउँ गाउँमा चुनावी अभियानको नेतृत्व गरेकी थिइन् । टीकापुर घटनामा दोषी बनाएपछि भुमिगत रहेका आफ्ना श्रीमान रेशमको वारेश बोकेर प्रतिनिधि सभा सदस्यको उम्मेदवारी दर्ता गराएकी थिइन् ।

लामो समयदेखि कर्णाली नदीबाट सिचाईका लागि निकालिएका कुलाहरुको उपभोक्ता समुहका अध्यक्ष रहेका र एमालेबाट २०७४ मा कैलाली १ को क प्रदेश सभा सदस्यको उम्मेदवार बनेका लालबीर यसपटक बर्दियाबाट स्वतन्त्र चुनाव  लडेका हुन् ।   जेलमै रहेका रेशमले वारेशनामा मार्फत बर्दिया २ मा  दर्ता गरेको उम्मेदवारी उजुरी परेपछि रद्ध भएको  थियो । रेशमको उम्मेदवारी रद्ध भएपछि नागरिक उन्मुक्तिको समर्थनमा लालबीर प्रतिनिधि सदस्य निर्वाचित भएका हुन् ।