सुदुरपश्चिममा समाननुपातिकमा एमाले अगाडी, तर पनि कांग्रेस सबै भन्दा ठुलो दल बन्ने

धनगढी । सुदुरपश्चिम प्रदेशमा  समानुपातिकमा नेकपा एमालेले अग्रता लिएको छ । प्रदेशमा प्रत्यक्षमा सबै भन्दा बढी सिट जितेको नेपाली कांग्रेस समानुपाितकमा एमालेलाई पछ्याइरहेको छ ।

शनिबार रातिसम्म एमालेले प्रदेशमा समानुपातिक तर्फ २ लाख ११ हजार प्राप्त गरेको छ ।  नेपाली कांग्रेसले समानुपातिक तर्फ २ लाख मत  प्राप्त गरेको छ ।

माओवादी केन्द्रले समानुपातिक तर्फ ९३ हजार ७२९ मत प्राप्त गरेर तेश्रो दल भैैरहेको छ ।शनिबार रातसम्म सुदुरपश्चिममा समानुपातिक तर्फ ६ लाख ६० हजार  मत गणना भैसकेको छ ।

सुदुरपश्चिममा बाजुरा बाहेकका आठ जिल्लामा मंसिर ४ मा भएको निर्वाचनमा करिब ९ लाख ६० हजार   मत खसेको थियो । प्रत्यक्ष तर्फका २९ सीटको नतिजा आइसकेपछि अहिले समानुपातिकको मतगणना भैरहेको छ । सुदुरपश्चिम प्रदेशमा पक्ष्यक्ष तर्फ नेपाली कांग्रेसले ११ , माओवादी केन्द्रले ८,  नागरिक उन्मुक्ति पार्टीले ५, एमालेले ३, नेकपा एकीकृत समाजवादीले २ र  स्वतन्त्रले १ सीट जितेको छ ।

 बाजुराका केही क्षेत्रमा दलहरुबीच झडप भएपछि मतदान  स्थगित  भएको थियो । स्थगित भएको क्षेत्रमा  शनिबार पुनः मतदान भएको छ ।

सुदुरपश्चिममा प्रदेश सभाका प्रत्यक्ष बिधिबाट ३० सदस्य र समानुपातिक बिधिबाट  २१ सदस्य निर्वाचित हुने गर्दछन् ।

सुदुरपश्चिममा समानुपातिक तर्फ हालसम्म नागरिक उन्मुक्ति पार्टीले ५३ हजार ९४७, नेकपा एकीकृत समाजवादीले ३६ हजार १८ र राप्रपाले २८ हजार ९७७ मत पाएका छन् ।

नेकपा एमाले सुदुरपश्चिम प्रदेश  कमिटीका सचिव धर्मराज  पाठक  समानुपातिकमा एमाले र कांग्रेसले समान सात सीट पाउने सम्भावना अहिलेकोसम्मको मत परिणामाले देखाएका बताउँछन् । ‘प्रत्यक्षमा कम सीट जिते पनि समानुपातिक मतले एमालेको प्रदेशमा स्थिति सुधार हुने अवस्था छ ।’ सचिव पाठकले भने  ‘बाजुरा पनि हाम्रो लागि अनुकुल भएकोले प्रदेशमा हामी दोश्रो दल बन्छौं ।’

नेपाली कांग्रेसका सुदुरपश्चिम प्रदेश समितिका महामन्त्री नरनारायण शाह ‘मनु’ प्रत्यक्ष र समानुपातिक  सहित नेपाली कांग्रेस प्रदेशमा सबै भन्दा ठुलो दल बनिरहेको बताउँछन् । 

कांग्रेस, माओवादी केन्द्र, नेकपा एकीकृत समाजवादी सहितको सत्ता गठबन्धनको  स्पष्ट बहुमत पुग्ने भएको छ । 

सुदुरपश्चिममा गठन्धन केही हदसम्म सफल भएको  र सन्तोषजनक नतिजा आएको महामन्त्री शाह बताउँछन् ।  ‘प्रदेश सभा निर्वाचनमा गठबन्धन नै बलियो बनेको छ ।  गठबन्धनको बहुमत पुगिरहेको छ ।’ शाहले भने   ‘गठबन्धन कायमै रहेमा अब प्रदेशमा गठबन्धनको सरकार बन्छ ।’

कसरी गणना हुन्छ  समानुपातिक  सीट <

देशमा  खसेको सदर मत  मध्य कुन दलले कति  मत पायो भनेर छुट्याइन्छ ।  प्रदेशमा  खसेको सदर मतको १ दशमलब ५ प्रतिशत मत पाउने दलहरु मात्र  समानुपातिक बिधिबाट सीट बाडफाडमा सहभागी हुन पाउँछन् । त्यसैले १ दशमलब ५ प्रतिशत भन्दा कम  सदर मत पाउने दलहरुले  पाएको मतलाइ गणनाबाट हटाइन्छ । अनि थ्रेसहोल्ड पार गरेको दलहरुको मतलाई मात्र आधार मानेर सुत्रको प्रयोगबाट  सीट बाडफड गरिन्छ ।